തിരുത്തല്‍ നടപടി നിര്‍ദ്ദേശങ്ങള്‍ സമര്‍പ്പിക്കും; ഗുലാം നബി ആസാദ് ഇന്ന് സോണിയ ഗാന്ധിയെ കാണുമെന്ന് സൂചന

തിരുത്തല്‍ നടപടികള്‍ക്കുള്ള നിര്‍ദേശങ്ങളുമായി ജി23 നേതാവ് ഗുലാം നബി ആസാദ് ഇന്ന് കോണ്‍ഗ്രസ് ഇടക്കാല അധ്യക്ഷ സോണിയ ഗാന്ധിയെ കാണുമെന്ന് സൂചന. ഇന്നലെ പതിനെട്ട് കോണ്‍ഗ്രസ് നേതാക്കള്‍ യോഗം ചേര്‍ന്ന് തയാറാക്കിയ നിര്‍ദേശങ്ങള്‍ ഗുലാം നബി ആസാദ്, സോണിയ ഗാന്ധിയെ ധരിപ്പിച്ചേക്കും. രാഹുല്‍ ഗാന്ധിയും പ്രിയങ്ക ഗാന്ധിയും കൂടിക്കാഴ്ചയില്‍ പങ്കെടുക്കുമെന്നാണ് സൂചന. എല്ലാവരെയും യോജിപ്പിച്ച് കൊണ്ട് പോകുന്ന കൂട്ടായ നേതൃത്വമാണ് കോണ്‍ഗ്രസിന് ഇപ്പോള്‍ ആവശ്യം. സംഘടനയുടെ എല്ലാ തലത്തിലും ചര്‍ച്ചകള്‍ നടത്തി തീരുമാനമെടുക്കാന്‍ കഴിയുന്ന നേതൃത്വം വേണമെന്നാണ് ജി23 നേതാക്കളുടെ നിലപാട്. ബിജെപിയെ എതിര്‍ക്കാന്‍ കോണ്‍ഗ്രസിനെ ശക്തിപ്പെടുത്തേണ്ടത് അത്യാവശ്യമാണ്. 2024 ലെ തെരഞ്ഞെടുപ്പില്‍ ബിജെപിക്ക് ശക്തമായ ബദലാകാന്‍ വേദിയൊരുക്കണം. ഇതിനായി സമാന മനസ്ഥിതിയുള്ള പാര്‍ട്ടികളുമായി ചര്‍ച്ചകള്‍ ആരംഭിക്കണമെന്ന നിര്‍ദേശം ജി23 സോണിയ ഗാന്ധിക്ക് മുന്നില്‍ വയ്ക്കും. അടുത്ത നടപടികള്‍ ഉടന്‍ പ്രഖ്യാപിക്കുമെന്നും ജി23 നേതാക്കള്‍ പുറത്തിറക്കിയ പ്രസ്താവനയില്‍ അറിയിച്ചിരുന്നു. ഇന്നലെ ഗുലാം നബി ആസാദിന്റെ വസതിയില്‍ കപില്‍ സിബല്‍, ആനന്ദ് ശര്‍മ, മനീഷ് തിവാരി, ശശി തരൂര്‍, ഭൂപീന്ദര്‍ സിംഗ് ഹൂഡ, മണി ശങ്കര്‍ അയ്യര്‍, പി.ജെ. കുര്യന്‍ തുടങ്ങി 18 നേതാക്കളാണ് നാല് മണിക്കൂറോളം യോഗം ചേര്‍ന്നത്.