രാജ്യസഭാ തെരഞ്ഞടുപ്പ്: റഹീമും സന്തോഷ് കുമാറും പത്രിക സമര്‍പ്പിച്ചു

തിരുവനന്തപുരം: രാജ്യസഭാ തെരഞ്ഞെടുപ്പിനായി എ.എ.റഹീമും പി.സന്തോഷ് കുമാറും നാമനിര്‍ദേശപത്രിക സമര്‍പ്പിച്ചു. നിയമസഭാ സെക്രട്ടേറിയെറ്റിലെത്തി വരണാധികാരി കവിത ഉണ്ണിത്താന് മുന്‍പാകെയാണ് പത്രിക സമര്‍പ്പിച്ചത്. മുഖ്യമന്ത്രി പിണറായി വിജയനും മന്ത്രിമാരും എല്‍ഡിഎഫിലെ ഘടകകക്ഷി നേതാക്കളും സ്ഥാനാര്‍ത്ഥികള്‍ക്കൊപ്പമുണ്ടായിരുന്നു. വലിയ.ഉത്തരവാദിത്വം ആണ് പാര്‍ട്ടിയും മുന്നണിയും ഏല്‍പ്പിച്ചിച്ചിരിക്കുന്നതെന്നും ഭരണഘടന മൂല്യങ്ങള്‍ ഉയര്‍ത്തിപ്പിടിച്ച് പാര്‍ലമെന്റല്‍ പ്രവര്‍ത്തിക്കുമെന്നും നാമനിര്‍ദേശ പത്രിക സമര്‍പ്പിച്ച ശേഷം മാധ്യമങ്ങളെ കണ്ട എ.എ.റഹീം പറഞ്ഞു. ഇടത് ആശയങ്ങള്‍ ഉയര്‍ത്തിപ്പിടിച്ച് പ്രവര്‍ത്തിക്കുമെന്നും യുവാക്കള്‍ നേരിടുന്ന പ്രശ്‌നങ്ങള്‍ രാജ്യസഭയുടൈ ശ്രദ്ധയില്‍ കൊണ്ട് വരുമെന്നും സന്തോഷ് കുമാര്‍ പറഞ്ഞു. പത്രിക സമര്‍പ്പണത്തിന് ശേഷം ഇരുവരും നിയമസഭാ സ്പീക്കറേയും കണ്ടു. കോണ്‍ഗ്രസ്സിന്റെ സീറ്റിലേക്ക് സ്ഥാനാര്‍ത്ഥിയെ കണ്ടെത്താനുള്ള ചര്‍ച്ചകള്‍ ഇപ്പോഴും തുടരുകയാണ്. ഈ മാസം 21 വരെ പത്രിക നല്‍കാന്‍ അനുവാദമുണ്ട്. മാര്‍ച്ച് 31 നാണ് തെരഞ്ഞെടുപ്പ്.