ഭൂമി തട്ടിപ്പ് കേസ് : സുരേഷ് ഗോപി എംപിയുടെ സഹോദരന്‍ അറസ്റ്റില്‍

ഭൂമി തട്ടിപ്പ് കേസില്‍ സുരേഷ് ഗോപി എംപിയുടെ സഹോദരന്‍ സുനില്‍ ഗോപി അറസ്റ്റില്‍. കോടതി വില്‍പന അസാധുവാക്കിയ ഭൂമിയാണെന്ന വിവരം മറച്ചുവച്ച് ആ ഭൂമി വില്‍ക്കാന്‍ ശ്രമിക്കുകയും, കൈപ്പറ്റിയ അഡ്വാന്‍സ് തുക തിരിച്ചു നല്‍കിയില്ലെന്നുമുള്ള പരാതിയിലാണ് സുനില്‍ ഗോപിക്കെതിരെ കേസെടുത്തിരിക്കുന്നത്. കേസില്‍ കോയമ്പത്തൂരിലെ ജില്ലാ ക്രൈംബ്രാഞ്ച് പൊലീസ് സുനില്‍ ഗോപിയെ അറസ്റ്റ് ചെയ്ത ശേഷം റിമാന്‍ഡ് ചെയ്തു. കോയമ്പത്തൂരിലെ ജിഎന്‍ മില്‍സിലെ ഗിരിധരന്‍ എന്ന വ്യക്തിയുടെ പരാതിയിലാണ് പൊലീസ് കേസെടുത്തിരിക്കുന്നത്. സുനില്‍ നവക്കരയിലെ 4.52 ഏക്കര്‍ ഭൂമി വാങ്ങിയിരുന്നു. എന്നാല്‍ ഭൂമിയുടെ റജിസ്ട്രേഷന്‍ അസാധുവാണെന്ന് കോടതി അറിയിച്ചു. ഈ വിവരം മറച്ചുവച്ച് ഭൂമി ഗിരിധരന് വില്‍ക്കാന്‍ ശ്രമിക്കുകയും, സുനില്‍ 97 ലക്ഷം രൂപ അഡ്വാന്‍സ് വാങ്ങുകയും ചെയ്തു. ഭൂമിയുടെ രേഖകള്‍ സുനില്‍ ഗോപിയുടെ പേരിലല്ലെന്ന് കണ്ടെത്തിയതിനെ തുടര്‍ന്ന് ഗിരിധരന്‍ അഡ്വാന്‍സ് തുക തിരികെ ചോദിച്ചുവെങ്കിലും സുനില്‍ നല്‍കാന്‍ തയാറായില്ല. ഇതാണ് കേസിനാസ്പദമായ സംഭവം. സുനില്‍ ഗോപി ഉള്‍പ്പെടെയുള്ള മൂന്ന് പേരുടെ അക്കൗണ്ടിലേക്കാണ് അഡ്വാന്‍സ് തുക നിക്ഷേപിച്ചത്. മറ്റ് രണ്ട് പേര്‍ക്കെതിരെയും പൊലീസ് കേസെടുത്തിട്ടുണ്ട്.