‘ആദ്യം കടം പറഞ്ഞ ടിക്കറ്റിന് ഒന്നാം സമ്മാനം; ഇന്ന് ഫോണില്‍ ബുക്ക് ചെയ്ത ടിക്കറ്റിന് രണ്ടാം സമ്മാനം’

ആലുവ: ആലുവ സ്വദേശിനിയായ ലോട്ടറി ഏജന്റ് സ്മിജയുടെ പിന്നാലെ തന്നെയുണ്ട് ഭാഗ്യദേവതയെന്ന് ഉറപ്പിച്ചുപറയാം. കഴിഞ്ഞകൊല്ലത്തെ സമ്മര്‍ ബമ്പര്‍ ഒന്നാം സമ്മാനം സ്മിജ വിറ്റ ടിക്കറ്റിനായിരുന്നു. വിറ്റത് എന്നങ്ങ് ഉറപ്പിച്ചു പറയാനാകില്ല. കാരണം പണം നല്‍കാതെ പറഞ്ഞുവെച്ച ടിക്കറ്റിനായിരുന്നു അന്ന് സമ്മാനംഅടിച്ചത്. തുടര്‍ന്ന് പറഞ്ഞുവെച്ചയാള്‍ക്ക് തന്നെ ടിക്കറ്റ് സ്മിജ കൈമാറി. ഇതോടെ സ്മിജയുടെ നല്ലമനസ്സിനെ അഭിനന്ദിച്ച് നിരവധിപേരാണ് രംഗത്തെത്തിയത്. ഇത്തവണത്തെ സമ്മര്‍ ബമ്പര്‍ രണ്ടാം സമ്മാനം അടിച്ചിരിക്കുന്നതും സ്മിജ വിറ്റ ടിക്കറ്റിനാണ്. ഇക്കുറിയും ഭാഗ്യദേവത കനിഞ്ഞത് പറഞ്ഞുവെച്ച ടിക്കറ്റിന്മേലാണ്. പണം നല്‍കി ടിക്കറ്റ് പറഞ്ഞുവെച്ച, ഹൈദരാബാദില്‍ താമസിക്കുന്ന തമിഴ്നാട് സ്വദേശിനി സുബറാവു പത്മയ്ക്കാണ് 25 ലക്ഷം രൂപ അടിച്ചത്. പറഞ്ഞുവെച്ചിരുന്ന ഈ ടിക്കറ്റുമായി സുബറാവു പത്മയെ കാത്തിരിക്കുകയാണ് സ്മിജ. കൃത്യം ഒരു വര്‍ഷം മുന്‍പത്തെ സമ്മര്‍ ബമ്പര്‍ ടിക്കറ്റാണ് ആലുവ കീഴ്മാട് പാലച്ചുവട് ചന്ദ്രന്‍, സ്മിജയോട് ഫോണിലൂടെ കടം പറഞ്ഞ് വാങ്ങിയത്. ഈ ടിക്കറ്റിന് ബമ്പര്‍ അടിച്ചതോടെ ടിക്കറ്റ് സ്മിജ, ചന്ദ്രന് കൈമാറുകയും ചെയ്തു. തുടര്‍ന്ന് സ്മിജ വാര്‍ത്തകളില്‍ ഇടംപിടിച്ചതോടെയാണ് സുബറാവു പത്മ, സ്മിജയെ തേടിയെത്തിയത്. ആലുവ രാജഗിരി ആശുപത്രിക്കു മുന്നിലെ സ്മിജയുടെ ടിക്കറ്റ് കൗണ്ടറില്‍ നേരിട്ടെത്തി പരിചയപ്പെടുകയും നിരന്തരം ഫോണിലൂടെ ടിക്കറ്റ് എടുക്കുകയും ചെയ്തിരുന്നു. ബമ്പര്‍ ടിക്കറ്റുകള്‍ക്കു പുറമേ ദൈനംദിന ടിക്കറ്റുകളും സുബറാവു പത്മ എടുത്തിരുന്നു. പണം ഓണ്‍ലൈനായിട്ടാണ് നല്‍കിയിരുന്നത്. ടിക്കറ്റ് സ്മിജ സൂക്ഷിക്കും. ഇതിനിടെ ലഭിച്ച ചെറിയ സമ്മാനങ്ങളുടെ തുക സ്മിജ, സുബറാവു പത്മയ്ക്ക് കൈമാറിയിരുന്നു. അപ്രതീക്ഷിതമായിട്ടാണ് സമ്മര്‍ ബമ്പറിന്റെ രണ്ടാം സമ്മാനവും സ്മിജയെ തേടിയെത്തിയത്. ടിക്കറ്റ് പണം അടച്ച് ബുക്ക് ചെയ്ത സുബറാവു പത്മ വരുന്നതും കാത്തിരിക്കുകയാണ് സ്മിജ.