ഏറ്റുമാനൂര്‍ മുന്‍ മേല്‍ശാന്തി ഉള്‍പ്പടെ മൂന്ന് പേര്‍ക്കെതിരെ ദേവസ്വം ബോര്‍ഡ് നടപടിയെടുക്കും

ഏറ്റുമാനൂര്‍ മഹാദേവക്ഷേത്രത്തില്‍ വിവിധ ക്രമക്കേടുകളില്‍ ഏര്‍പ്പെട്ട മൂന്ന് പേര്‍ക്കെതിരെ തിരുവിതാംകൂര്‍ ദേവസ്വം ബോര്‍ഡ് വകുപ്പുതല നടപടിയെടുക്കും. ദേവസ്വം വിജിലന്‍സ് എസ്.പി പി.ബിജോയുടെ റിപ്പോര്‍ട്ടിന്റെ അടിസ്ഥാനത്തിലാണ് നടപടി. ക്ഷേത്രത്തിലെ 81 മുത്തുകളുള്ള സ്വര്‍ണ തിരുവാഭരണം മാറ്റി പകരം മറ്റൊരുമാല വച്ചതിന് മുന്‍ മേല്‍ശാന്തി കേശവന്‍ സത്യേഷ്, ദേവസ്വം തിരുവാഭരണം കമ്മിഷണര്‍ എസ്. അജിത് കുമാര്‍ എന്നിവര്‍ക്കെതിരെയും തീപിടിത്തത്തില്‍ മൂലബിംബത്തിന് കേടുപാടുണ്ടായത് മറച്ചുവച്ചതിന് ക്ഷേത്രം അഡ്മിനിസ്ട്രേറ്റീവ് ഓഫീസര്‍ മുരാരി ബാബുവിനെതിരെയുമാണ് ദേവസ്വം ബോര്‍ഡ് നടപടിയെടുക്കുന്നത്. 81 മുത്തുകളുള്ള രുദ്രാക്ഷ മാല മാറ്റി 72 മുത്തുകളുള്ള മറ്റൊരു മാല വച്ചത് കേശവന്‍ സത്യേഷാണെന്നാണ് വിജിലന്‍സിന്റെ കണ്ടെത്തല്‍. സസ്‌പെന്‍ഷനിലുള്ള ഇയാള്‍ക്കെതിരെ ക്രിമിനല്‍ സിവില്‍ നടപടികള്‍ക്ക് വിജിലന്‍സ് ശുപാര്‍ശ ചെയ്യും. തിരുവാഭരണങ്ങള്‍ സംബന്ധിച്ച കണക്കെടുപ്പില്‍ വീഴ്ചവരുത്തിയതിനാണ് അജിത് കുമാറിനെതിരെ നടപടി. തിരുവാഭരണം കാണാതായതിനെക്കുറിച്ച് നടത്തിയ അന്വേഷണത്തിലാണ് തീപിടിത്തം സംബന്ധിച്ചും വിജിലന്‍സിന് നിര്‍ണായക തെളിവുകള്‍ ലഭിച്ചത്. സ്വര്‍ണ തിരുവാഭരണം മാറ്റിയതുമായി ബന്ധപ്പെട്ട അന്വേഷണത്തിനിടെയാണ് 2021 ജനുവരി 17 ന് ശ്രീകോവിലിലുണ്ടായ അഗ്നിബാധയെപ്പറ്റിയും പരിശോധന നടന്നത്. നെയ്യ്, എണ്ണ, കര്‍പ്പൂരം എന്നിവ ശ്രീകോവിലിനുള്ളില്‍ കുട്ടകളില്‍ കൂട്ടിവച്ചതാണ് അഗ്നിബാധയ്ക്ക് കാരണമായത്. ക്ഷേത്രം അഡ്മിനിസ്ട്രേറ്റീവ് ഓഫീസര്‍ മുരാരി ബാബു ഇക്കാര്യം ഉപദേശക സമിതി സെക്രട്ടറിയുടെ അറിവോടെ മറച്ചുവച്ചു. അഡ്മിനിസ്‌ട്രേറ്റിവ് ഓഫീസറുടെ പേരിലുള്ള ബാങ്ക് അക്കൗണ്ട് ഓഡിറ്റ് ചെയ്യണം, വിഗ്രഹത്തിന്റെ അഷ്ടബന്ധത്തിന്റെ ഉറപ്പ് പരിശോധിക്കണം, ഉത്സവ, ആട്ടവിശേഷ ആഘോഷങ്ങള്‍ പൂര്‍ണമായും ബോര്‍ഡ് ഏറ്റെടുക്കണം, ഉപദേശക സമിതി, അഡ് ഹോക്ക് കമ്മിറ്റി എന്നിവയെ ഒഴിവാക്കണം തുടങ്ങിയവയാണ് വിജിലന്‍സ് ശുപാര്‍ശകള്‍. മേല്‍ശാന്തിക്കെതിരെ ക്രിമിനല്‍ നടപടിയുമുണ്ടാവുമെന്ന് ദേവസ്വം ബോര്‍ഡ് പ്രസിഡന്റ് കെ. അനന്തഗോപന്‍ അറിയിച്ചു.