പ്രണയബന്ധം അവസാനിപ്പിച്ചു; കാമുകിയെ വെട്ടിക്കൊന്ന് യുവാവ്; കൈ അറുത്തെടുത്തു

അഹമ്മദാബാദ്: പ്രണയബന്ധം അവസാനിപ്പിക്കുന്നെന്ന് അറിയിച്ച പെണ്‍കുട്ടിയെ അതിക്രൂരമായി വെട്ടിക്കൊന്ന് കാമുകന്‍. ഗുജറാത്തിലെ വഡോദരയിലാണ് സംഭവം. തൃഷ സോളങ്കി (19) ആണ് വെട്ടേറ്റ് മരിച്ചത്. തൃഷയുടെ കാമുകന്‍ കല്‍പേഷ് ഠാക്കൂറിനെ (23) പൊലീസ് അറസ്റ്റ് ചെയ്തു. തൃഷയെ പലതവണ വെട്ടിയ ശേഷം ശരീരത്തില്‍നിന്നും കൈ വെട്ടിമാറ്റിയ നിലയിലായിരുന്നു. മൂന്നുവര്‍ഷമായി തൃഷയുമായി പ്രണയത്തിലായിരുന്നെന്ന് കല്‍പേഷ് പൊലീസിനോട് പറഞ്ഞു. എന്നാല്‍ രണ്ടു മാസങ്ങള്‍ക്കു മുന്‍പ് തൃഷ പ്രണയത്തില്‍നിന്നും പിന്മാറുന്നതായും തനിക്ക് മറ്റൊരു സൗഹൃദം ഉണ്ടെന്നും കല്‍പേഷിനെ അറിയിക്കുകയായിരുന്നു. ഇതോടെയാണ് പ്രശ്‌നങ്ങളുടെ തുടക്കം. പ്രണയം തുടരണമെന്ന് പലതവണ ആവശ്യപ്പെട്ടിട്ടും തൃഷ വഴങ്ങിയില്ല. ഇതോടെ ആത്മഹത്യ ചെയ്യുമെന്ന് ഇയാള്‍ ഭീഷണിപ്പെടുത്താനും ആരംഭിച്ചു. നേരിട്ടു കണ്ട് സംസാരിക്കണമെന്നു പറഞ്ഞാണ് ദേശീയപാത 48ന് സമീപമുള്ള ആളൊഴിഞ്ഞ സ്ഥലത്തേക്ക് ഇയാള്‍ തൃഷയുമായി എത്തിയത്. ഒരിക്കല്‍ കൂടി പ്രണയം തുടരാന്‍ ആവശ്യപ്പെട്ടിട്ടും തൃഷ വഴങ്ങിയില്ല. ഈ സമയം കയ്യില്‍ കരുതിയിരുന്ന ആയുധം വച്ച് ഇയാള്‍ തൃഷയുടെ കഴുത്തില്‍ ആഞ്ഞുവെട്ടി. പിന്നീട് പലതവണ വെട്ടി മരണം ഉറപ്പിച്ചു. മൃതദേഹത്തില്‍നിന്നും കൈയും വെട്ടിമാറ്റി. ഇതിനുശേഷം സ്ഥലം വിട്ടു. നാട്ടുകാരാണ് മൃതദേഹം കണ്ടെത്തി പൊലീസിനെ അറിയിച്ചത്. ആധാര്‍ കാര്‍ഡ് മൃതദേഹത്തില്‍ നിന്നും കിട്ടിയതോടെയാണ് ആളെ തിരിച്ചറിയാന്‍ കഴിഞ്ഞത്. ഗോധ്ര സ്വദേശിയായ തൃഷ വഡോദരയിലുള്ള അമ്മാവന്റെ വീട്ടില്‍ നിന്നാണ് പഠിച്ചിരുന്നത്.