തൊഴിലവസരങ്ങള്‍ പോലും ഇല്ലാതാക്കുന്ന നയമാണ് കേന്ദ്ര സര്‍ക്കാറിന്റേതെന്ന് മന്ത്രി

മാത്തില്‍: തൊഴില്‍ രഹിതരായ യുവജനങ്ങള്‍ക്ക് തൊഴില്‍ ലഭ്യമാക്കാന്‍ സംസ്ഥാന സര്‍ക്കാര്‍ വിവിധങ്ങളായ പ്രവര്‍ത്തനങ്ങള്‍ നടപ്പാക്കുമ്പോള്‍ ഉള്ള തൊഴിലവസരങ്ങള്‍ പോലും ഇല്ലാതാക്കുന്ന നയമാണ് കേന്ദ്ര സര്‍ക്കാറിന്റേതെന്ന് ടൂറിസം-പൊതുമരാമത്ത് മന്ത്രി പി എ മുഹമ്മദ് റിയാസ് പറഞ്ഞു. സിപിഐ എം 23 ആം പാര്‍ടി കോണ്‍ഗ്രസിന്റെ ഭാഗമായി മാത്തിലില്‍ 'തൊഴിലിലായ്മയും കേന്ദ്ര സംസ്ഥാന സര്‍ക്കാറുകളുടെ സമീപനവും, എന്ന വിഷയത്തില്‍ നടന്ന സെമിനാര്‍ ഉദ്ഘാടനം ചെയ്യുകയായിരുന്നു മന്ത്രി. ജനങ്ങള്‍ക്ക് തൊഴില്‍ ലഭിക്കേണ്ടുന്ന സ്ഥാപനങ്ങളെ ഒന്നൊന്നായി കേന്ദ്ര സര്‍ക്കാര്‍ വിറ്റഴിക്കുന്നു. സംസ്ഥാന സരക്കാറാകട്ടെ വില്‍പ്പനയ്ക്ക് വെക്കുന്ന അത്തരം സ്ഥാപനങ്ങള്‍ ഏറ്റെടുക്കാന്‍ തയ്യാറാകുന്നു. ഇതാണ് രണ്ട് നയങ്ങള്‍ തമ്മിലുള്ള വ്യത്യാസം. അത് മാത്രമല്ല, കേന്ദ്ര സര്‍വീസില്‍ ഒഴിഞ്ഞുകിടക്കുന്ന 8.75 ലക്ഷത്തിലേറെ ഒഴിവുകള്‍ നികത്താനും തയ്യാറാകുന്നില്ല. എന്നാല്‍ ഒന്നാം പിണറായി സര്‍ക്കാര്‍ പി എസ് സി നിയമനങ്ങളില്‍ റെക്കോര്‍ഡിട്ടിരിക്കുന്നു. എന്നിട്ടും ഉദ്യോഗാര്‍ഥികളെ തെറ്റിദ്ധരിപ്പിച്ച് സമരത്തിനിറക്കി വിടാനാണ് യുഡിഎഫ് ശ്രമിച്ചത്. അപ്പോഴും കേന്ദ്രത്തിന്റെ തൊഴില്‍ നിയമന നിരോധനത്തെ കുറിച്ച് യുഡിഎഫ് മിണ്ടിയില്ല. 2016ല്‍ എല്‍ഡിഎഫ് അധികാരത്തില്‍ വന്നപ്പോള്‍ സംസ്ഥാനത്ത്. 300 സ്റ്റാര്‍ട്ടപ്പുകളാണ് ഉണ്ടായിരുന്നത്. 5 വര്‍ഷം കൊണ്ട് അത് 4000 ആയി ഉയര്‍ത്തി. സ്റ്റാര്‍ട്ടപ്പുകളിലെ നിക്ഷേപം 50 കോടിയില്‍ നിന്നും 3200 കോടിയായി ഉയര്‍ന്നു. ഇതാണ് രണ്ട് വ്യത്യസ്ത സമീപനങ്ങള്‍. പാര്‍ടി കോണ്‍ഗ്രസ് സെമിനാറുകളില്‍ പങ്കെടുക്കുന്നതിന് നേതാക്കള്‍ക്ക് വിലക്കേര്‍പ്പെടുത്തിയ കോണ്‍ഗ്രസിന് ബിജെപിയുമായി വേദി പങ്കിടുന്നതിന് ഒരു പ്രയാസവുമില്ല. കോണ്‍ഗ്രസും ബിജെപിയും ഒരേ തൂവല്‍ പക്ഷികളെ പോലെയാണ് നിലകൊള്ളുന്നത്. ബിജെപിക്ക് എതിരെ നില്‍ക്കേണ്ടുന്ന ഏത് സാഹചര്യത്തിലും അവര്‍ മാറി നില്‍ക്കും. സെമിനാറുകളില്‍ നിന്നും കോണ്‍ഗ്രസ് വിട്ടു നില്‍ക്കുന്നുതും അതിന്റെ തെളിവാണെന്നും മന്ത്രി പറഞ്ഞു. പാര്‍ടി കോണ്‍ഗ്രസിന്റെ ഭാഗമായി ഏരിയയിലെ മികച്ച സംഘാടക സമിതി ഓഫീസുകളായി തിരഞ്ഞെടുക്കപ്പെട്ട പെരിങ്ങോം ലോക്കലിലെയും എരമം തെക്കേക്കര ബ്രാഞ്ചിലെയും ഓഫീസുകള്‍ക്ക് ഉപഹാരങ്ങള്‍ വിതരണം ചെയ്തു. പ്രാദേശിക രാഷ്ട്രീയ ചരിത്രം ഉള്‍പ്പെടുത്തി നിര്‍മിച്ച ഹിസ്റ്ററി വാള്‍ ടി ഐ മധുസൂദനന്‍ എംഎല്‍എ പ്രകാശനം ചെയ്തു. ഡിവൈഎഫ്‌ഐ സംസ്ഥാന സെക്രട്ടറി വി കെ സനോജ്, എഐവൈഎഫ് സംസ്ഥാന സെക്രട്ടറി ടി ടി ജിസ്മോന്‍, എ കെ രമ്യ,എം ഷാജര്‍, മനു തോമസ്,സരിന്‍ ശശി തുടങ്ങിയവര്‍ സംസാരിച്ചു. സി സത്യപാലന്‍ അധ്യക്ഷനായി. പി ശശിധരന്‍ സ്വാഗതം പറഞ്ഞു.