24 കുടുംബങ്ങളുടെ എഫ്.ഡി. ഐപിഎല്‍ വാതുവെപ്പിന്; പോസ്റ്റ്മാസ്റ്റര്‍ തട്ടിയത് ഒരു കോടിയോളം രൂപ

ഭോപാല്‍: പോസ്റ്റ് ഓഫീസില്‍ സ്ഥിരനിക്ഷേപത്തിനായി നല്‍കിയ ഒരു കോടിയോളം രൂപ ഐ.പി.എല്‍. വാതുവെയ്പ്പിനായി തട്ടിയെടുത്ത പോസ്റ്റ്മാസ്റ്റര്‍ അറസ്റ്റില്‍. മധ്യപ്രദേശിലെ സാഗര്‍ ജില്ലയിലെ ബിന സബ് പോസ്റ്റ് ഓഫീസില്‍ പോസ്റ്റ്മാസ്റ്ററായ വിശാല്‍ അഹിര്‍വാറിനെയാണ് പോലീസ് അറസ്റ്റ് ചെയ്തത്. കഴിഞ്ഞ രണ്ടുവര്‍ഷത്തിനിടെ ഇത്തരത്തില്‍ ഒരു കോടിയോളം രൂപ ഐ.പി.എല്‍. വാതുവെയ്പ്പിനായി ചിലവഴിച്ചുണ്ടെന്ന് പ്രതി പോലീസിനോട് സമ്മതിച്ചു. പോസ്റ്റ് ഓഫീസില്‍ ഫിക്സഡ് ഡെപ്പോസിറ്റ്(എഫ്.ഡി) അക്കൗണ്ട് തുടങ്ങാനെത്തിയ 24 കുടുംബങ്ങളുടെ പണമാണ് പോസ്റ്റ്മാസ്റ്റര്‍ തട്ടിയെടുത്തത്. ഇവരുടെ പണം സ്വീകരിച്ച് അക്കൗണ്ട് തുറക്കാതെ എഫ്.ഡി. അക്കൗണ്ടിന്റെ വ്യാജ സര്‍ട്ടിഫിക്കറ്റും പാസ് ബുക്കും നല്‍കിയായിരുന്നു കബളിപ്പിക്കല്‍. ഈ പണമെല്ലാം പ്രതി വാതുവെയ്പ്പിനായി ഉപയോഗിക്കുകയായിരുന്നു. അടുത്തിടെ ഭര്‍ത്താവ് മരിച്ച വര്‍ഷ എന്ന യുവതിക്ക് ഒമ്പത് ലക്ഷം രൂപയാണ് പോസ്റ്റ് മാസ്റ്റര്‍ നടത്തിയ തട്ടിപ്പില്‍ നഷ്ടമായത്. ഭര്‍ത്താവിന്റെ പേരിലുണ്ടായിരുന്ന ഒമ്പത് ലക്ഷം രൂപയുടെ സ്ഥിരനിക്ഷേപം പിന്‍വലിക്കാന്‍ എത്തിയപ്പോഴാണ് അക്കൗണ്ടുമായി ബന്ധപ്പെട്ട രേഖകളെല്ലാം വ്യാജമാണെന്നും യഥാര്‍ഥത്തില്‍ അക്കൗണ്ട് തുടങ്ങിയിട്ടില്ലെന്നും മനസിലായത്. കോവിഡ് ബാധിച്ചാണ് വര്‍ഷയുടെ ഭര്‍ത്താവും ഭര്‍തൃപിതാവും അടുത്തിടെ മരിച്ചത്. കിഷോരി ഭായ് എന്ന വയോധികയ്ക്ക് അഞ്ച് ലക്ഷം രൂപയാണ് തട്ടിപ്പില്‍ നഷ്ടപ്പെട്ടത്. നാല് പെണ്‍മക്കളടങ്ങുന്നതാണ് ഇവരുടെ കുടുംബം. മക്കളുടെ വിവാഹത്തിനുള്ള പണമാണ് പോസ്റ്റ് ഓഫീസില്‍ നിക്ഷേപിച്ചിരുന്നത്. എന്നാല്‍ ഇതും വിശാല്‍ തട്ടിയെടുക്കുകയായിരുന്നു. റിട്ട. സര്‍ക്കാര്‍ ജീവനക്കാരനായ മറ്റൊരാള്‍ക്ക് ഏകദേശം 18 ലക്ഷം രൂപയും നഷ്ടമായിട്ടുണ്ട്. ഇത്തരത്തില്‍ നിരവധി പേരാണ് തട്ടിപ്പിനിരയായതെന്നും പോലീസ് പറഞ്ഞു.