മുതിര്‍ന്ന നേതാവ് കപില്‍ സിബല്‍ കോണ്‍ഗ്രസ് വിട്ടു; എസ്പിയുടെ രാജ്യസഭാ സ്ഥാനാര്‍ഥി

മുതിര്‍ന്ന അഭിഭാഷകനും മുന്‍കേന്ദ്രമന്ത്രിയും കോണ്‍ഗ്രസ് നേതാവുമായ കപില്‍ സിബല്‍ കോണ്‍ഗ്രസ് അംഗത്വം രാജിവച്ചു. സമാജ്വാദി പാര്‍ട്ടി (എസ്പി) ടിക്കറ്റില്‍ രാജ്യസഭയിലേക്ക് പത്രിക നല്‍കി. എസ്പി അധ്യക്ഷന്‍ അഖിലേഷ് യാദവിനൊപ്പമെത്തിയാണ് പത്രിക നല്‍കിയത്. മേയ് 16ന് രാജിക്കത്ത് സമര്‍പ്പിച്ചിരുന്നുവെന്നും പ്രധാനമന്ത്രി നരേന്ദ്ര മോദിക്കെതിരെ വിശാല സഖ്യമാണ് ലക്ഷ്യമെന്നും കപില്‍ സിബല്‍ പ്രതികരിച്ചു. കോണ്‍ഗ്രസില്‍ നേതൃമാറ്റം ആവശ്യപ്പെട്ട് രംഗത്തെത്തിയ 23 നേതാക്കളില്‍ ഒരാളാണ് കപില്‍ സിബല്‍. സ്വതന്ത്ര സ്ഥാനാര്‍ഥിയായിട്ടാണ് നാമനിര്‍ദേശ പത്രിക സമര്‍പ്പിച്ചിരിക്കുന്നതെന്നും രാജ്യസഭയില്‍ സ്വതന്ത്ര ശബ്ദമാകാന്‍ ആഗ്രഹിക്കുന്നുവെന്നും കപില്‍ സിബല്‍ പറഞ്ഞു. മൂന്ന് രാജ്യസഭാ സീറ്റുകളിലേക്കു വിജയിക്കാനാകുമെന്ന പ്രതീക്ഷയിലാണ് സമാജ്വാദി പാര്‍ട്ടി. അടുത്തിടെ എസ്പി നേതാവ് അസം ഖാനു വേണ്ടി സുപ്രീം കോടതിയില്‍ ഹാജരായ കപില്‍ സിബല്‍ അദ്ദേഹത്തിന് ഇടക്കാല ജാമ്യം നേടിക്കൊടുത്തിരുന്നു. 2017ല്‍ എസ്പിയില്‍ കുടുംബകലഹം ഉണ്ടായപ്പോള്‍ സൈക്കില്‍ ചിഹ്നം നേടാന്‍ അഖിലേഷിനെ സഹായിച്ചത് കപില്‍ സിബല്‍ ആയിരുന്നു. ഈ മാസം ആദ്യം രാജസ്ഥാനിലെ ജയ്പുരില്‍ നടന്ന കോണ്‍ഗ്രസ് ചിന്തന്‍ ശിബിരത്തില്‍ കപില്‍ സിബല്‍ പങ്കെടുത്തിരുന്നില്ല. അടുത്ത മാസമാണ് രാജ്യസഭാ തിരഞ്ഞെടുപ്പ്. ഉത്തര്‍പ്രദേശില്‍ 11 സീറ്റുകളിലാണ് ഒഴിവുവരുന്നത്. ഇതില്‍ മൂന്ന് സീറ്റുകള്‍ എസ്പിക്ക് അനുകൂലമാണ്. അതിലൊന്നാണ് കപില്‍ സിബലിനായി മാറ്റിവച്ചിരിക്കുന്നത്. അടുത്തിടെ, പഞ്ചാബ് കോണ്‍ഗ്രസ് മുന്‍ അധ്യക്ഷന്‍ സുനില്‍ ഝാക്കറും ഗുജറാത്ത് കോണ്‍ഗ്രസ് വര്‍ക്കിങ് പ്രസിഡന്റായിരുന്ന ഹാര്‍ദിക് പട്ടേലും കോണ്‍ഗ്രസ് വിട്ടിരുന്നു.