പോരാട്ടത്തിന് ഇനി നാല് നാള്‍ കൂടി; അവസാനവട്ട ഓട്ടപ്രദക്ഷണത്തില്‍ സ്ഥാനാര്‍ഥികള്‍

സംസ്ഥാനത്തെ ചൂടുപിടിപ്പിച്ചിരിക്കുന്ന തൃക്കാക്കര ഉപതിരഞ്ഞെടുപ്പിന് ഇനി നാല് ദിവസം. ഭവന സന്ദര്‍ശനവും വാഹന പ്രചാരണവും ഒക്കെ സജീവമാക്കി അവസാനവട്ട ഓട്ട പ്രദക്ഷണത്തിലാണ് സ്ഥാനാര്‍ഥികള്‍. നടി ആക്രമിക്കപ്പെട്ട കേസും പി.സി.ജോര്‍ജിന്റെ അറസ്റ്റും തൃക്കാക്കരയെ ചൂടുപിടിപ്പിച്ചിട്ടുണ്ട്. പരസ്യ പ്രചാരണത്തിന് പൂട്ടുവീഴുമെന്നിരിക്കെ സ്ഥാനാര്‍ഥികള്‍ വോട്ടുറപ്പിക്കാനുള്ള നെട്ടോട്ടത്തിലാണ്. രാത്രി വൈകി തിരഞ്ഞെടുപ്പ് പ്രചാരണം വിലയിരുത്തിയ കോണ്‍ഗ്രസ്, ബൂത്ത് കേന്ദ്രീകരിച്ചുള്ള പ്രചാരണത്തിന് മുതിര്‍ന്ന നേതാക്കളെ തന്നെ രംഗത്തിറക്കി. വാഹന പ്രചാരണത്തില്‍ തന്നെയാണ് എല്‍ഡിഎഫ് സ്ഥാനാര്‍ഥി ഡോ.ജോ ജോസഫിന്റെ പര്യടനം. ചളിക്ക വട്ടം കേന്ദ്രീകരിച്ചായിരുന്നു പ്രചാരണം. വികസനത്തിനായി നിയമസഭയില്‍ നൂറ് തികയ്ക്കാന്‍ എല്‍ഡിഎഫിന് വോട്ട് ചെയ്യണമെന്ന് വോട്ടര്‍മാരെ ഓര്‍മിപ്പിച്ചാണ് ഓരോയിടത്തും പ്രസംഗം. എ.എന്‍. രാധാകൃഷ്ണനു വേണ്ടി പ്രധാന നേതാക്കളെ എല്ലാം മണ്ഡലത്തിലിറക്കി ബിജെപിയും പ്രചാരണം ശക്തിപ്പെടുത്തി. പി.സി. ജോര്‍ജിന്റെ അറസ്റ്റ് കൂടി ആയുധമാക്കിയാണ് ബിജെപിയുടെ പ്രചാരണം.