ഡല്‍ഹി വിമാനത്താവളത്തില്‍ വന്‍ കൊക്കെയ്ന്‍ വേട്ട

ഡല്‍ഹി അന്താരാഷ്ട്ര വിമാനത്താവളത്തില്‍ വന്‍ ലഹരിവേട്ട. മലാവിയന്‍ വനിതയില്‍ നിന്ന് 9.11 കോടി രൂപയുടെ കൊക്കെയ്ന്‍ കസ്റ്റംസ് പിടികൂടി. ശരീരത്തിനുള്ളില്‍ ഒളിപ്പിച്ചാണ് മയക്കുമരുന്ന് കടത്താന്‍ ശ്രമിച്ചത്. മലാവിയുടെ തലസ്ഥാനമായ ലിലോങ്വെയില്‍ നിന്ന് എത്തിയ വനിതയാണ് പിടിയിലായത്. സ്ത്രീയുടെ പെരുമാറ്റത്തില്‍ സംശയം തോന്നി പരിശോധിച്ചെങ്കിലും കസ്റ്റംസിന് ഒന്നും കണ്ടെത്താനായില്ല. വൈദ്യപരിശോധനയില്‍ ശരീരത്തിനുള്ളില്‍ ഒളിപ്പിച്ച വസ്തുക്കള്‍ ദൃശ്യമായി. 607 ഗ്രാം കൊക്കെയ്ന്‍ അടങ്ങുന്ന 51 ക്യാപ്സ്യൂളുകള്‍ ഇവരില്‍ നിന്നും പുറത്തെടുത്തു. അന്താരാഷ്ട്ര വിപണിയില്‍ 9.11 കോടി രൂപ മൂല്യം വരുമെന്ന് അധികൃതര്‍ അറിയിച്ചു. ഇവരുടെ അറസ്റ്റ് രേഖപ്പെടുത്തിയെന്നും കൂടുതല്‍ അന്വേഷണം നടന്നുവരികയാണെന്നും അധികൃതര്‍ കൂട്ടിച്ചേര്‍ത്തു.