മൂസവാല വധം പാഠമായി; 424 വിവിഐപികളുടെ സുരക്ഷ പുനഃസ്ഥാപിച്ച് ഭഗവന്ത് സര്‍ക്കാര്‍

അമൃത്സര്‍ പഞ്ചാബി ഗായകനും കോണ്‍ഗ്രസ് നേതാവുമായ സിദ്ദു മൂസവാല കൊല്ലപ്പെട്ടതിനു പിന്നാലെ പഞ്ചാബില്‍ 424 വിവിഐപികളുടെയും സുരക്ഷ പുനഃസ്ഥാപിച്ചു. വിവിഐപികളുടെ സുരക്ഷ പിന്‍വലിച്ചതിനും അവരുടെ പേരുകള്‍ പുറത്തുവിട്ടതിനും ഭഗവന്ത് മാന്റെ നേതൃത്വത്തിലുള്ള പഞ്ചാബ് സര്‍ക്കാരിനെതിരെ പ്രതിപക്ഷം രൂക്ഷ വിമര്‍ശനം ഉന്നയിച്ചിരുന്നു. ഇതിനു പിന്നാലെയാണ് നടപടി. 'വിഐപി സംസ്‌കാരം' ഇല്ലാതാക്കാനുള്ള നീക്കത്തിന്റെ ഭാഗമായാണ് 424 വിവിഐപികളുടെ സുരക്ഷ പിന്‍വലിച്ചത്. 1984 ജൂണില്‍ സുവര്‍ണ ക്ഷേത്ര സമുച്ചയത്തില്‍നിന്ന് ഭീകരരെ തുരത്താന്‍ സൈന്യം നടത്തിയ 'ഓപ്പറേഷന്‍ ബ്ലൂസ്റ്റാറിന്റെ'യും 'ഗല്ലുഘര ആഴ്ച'യുടെയും പശ്ചാത്തലത്തിലായിരുന്നു സുരക്ഷ പിന്‍വലിക്കാനുള്ള തീരുമാനം. മേയ് 29നാണ് പഞ്ചാബിലെ മാന്‍സ ജില്ലയില്‍ സിദ്ദു മൂസവാല വെടിയേറ്റ് മരിച്ചത്. സംഭവം ഗുണ്ടാസംഘങ്ങള്‍ തമ്മിലുള്ള പകയാണെന്നും ലോറന്‍സ് ബിഷ്ണോയി സംഘമാണ് ഇതിന് പിന്നിലെന്നുമാണു പൊലീസ് പറയുന്നത്. വധക്കേസില്‍ അന്വേഷണം പുരോഗമിക്കുകയാണ്.