എഐസിസി ആസ്ഥാനത്ത് കയറി പൊലീസ്; സച്ചിന്‍ പൈലറ്റ് കസ്റ്റഡിയില്‍

കോണ്‍ഗ്രസ് നേതാവ് രാഹുല്‍ ഗാന്ധിയെ തുടര്‍ച്ചയായി മൂന്നാം ദിവസവും എന്‍ഫോഴ്‌സ്‌മെന്റ് ഡയറക്ടറേറ്റ് (ഇഡി) ചോദ്യം ചെയ്യുന്നതിനിടെ എഐസിസി ആസ്ഥാനത്തിനു മുന്നില്‍ പ്രതിഷേധം കനക്കുന്നു. കോണ്‍ഗ്രസ് ആസ്ഥാനത്തേക്കു ഡല്‍ഹി പൊലീസ് കടന്നതിനു പിന്നാലെയാണു പ്രവര്‍ത്തകരുടെ പ്രതിഷേധം ശക്തമായത്. രാഹുലിന്റെ അടുപ്പക്കാരനും യുവനേതാവുമായ സച്ചിന്‍ പൈലറ്റിനെ പൊലീസ് കസ്റ്റഡിയിലെടുത്തു. കോണ്‍ഗ്രസ് ആസ്ഥാനത്തു പൊലീസും ദ്രുതകര്‍മ സേനയും കയറി പ്രവര്‍ത്തകരെ മര്‍ദിച്ചതിനെതിരെ വ്യാഴാഴ്ച രാജ്യവ്യാപക പ്രക്ഷോഭം നടത്താന്‍ പാര്‍ട്ടി തീരുമാനിച്ചു. പാര്‍ട്ടി എംപിമാരോടു ഡല്‍ഹിയിലെത്താന്‍ നിര്‍ദേശം നല്‍കി. സംസ്ഥാന രാജ്ഭവനുകളും ഉപരോധിക്കും. മറ്റന്നാള്‍ ജില്ലാ ആസ്ഥാനങ്ങളിലാണു പ്രതിഷേധം. പൊലീസുകാര്‍ സര്‍ക്കാരിന്റെ ഗുണ്ടകളെന്ന് കോണ്‍ഗ്രസ് നേതാവ് രണ്‍ദീപ് സുര്‍ജെവാലെ ആരോപിച്ചു. പാര്‍ട്ടി ഓഫിസില്‍ പൊലീസ് അക്രമം കാട്ടിയെന്നു നേതാക്കള്‍ ആരോപിച്ചു. കോണ്‍ഗ്രസ് നേതാക്കളെയും പ്രവര്‍ത്തകരെയും കസ്റ്റഡിയിലെടുത്തു. ഇഡി ഓഫിസിനു മുന്നില്‍ രാഹുല്‍ ഗാന്ധിക്കു പിന്തുണയുമായി എത്തിയവരെയും കസ്റ്റഡിയിലെടുത്തിട്ടുണ്ട്. ഇഡി ഓഫിസിനു മുന്നില്‍ പ്രവര്‍ത്തകര്‍ ടയറുകള്‍ കൂട്ടിയിട്ടു കത്തിച്ചു. പ്രവര്‍ത്തകരെ പൊലീസ് ബസുകളിലേക്കു വലിച്ചിഴച്ചു കൊണ്ടുപോകുന്ന ദൃശ്യങ്ങള്‍ പുറത്തുവന്നു. മുതിര്‍ന്ന നേതാക്കളായ അധീര്‍ രഞ്ജന്‍ ചൗധരി, ഭൂപേഷ് ബാഗല്‍, പവന്‍ ഖേര തുടങ്ങിയ നേതാക്കള്‍ പ്രതിഷേധങ്ങളുടെ ഭാഗമായി. സര്‍ക്കാരിന്റെ ഉത്തരവനുസരിച്ചുള്ള പൊലീസ് ഗുണ്ടായിസമാണു നടക്കുന്നതെന്ന് അധീര്‍ രഞ്ജന്‍ ചൗധരി പറഞ്ഞു. രാജ്യത്തിന്റെ ചരിത്രത്തില്‍ ഇതുവരെ ഇത്തരം അപരിഷ്‌കൃതമായ നടപടികള്‍ ഉണ്ടായിട്ടില്ലെന്നും അദ്ദേഹം ആരോപിച്ചു.