ആശുപത്രിയിലെ ടാബുകള്‍ മോഷ്ടിച്ചു വിറ്റു; മാസങ്ങള്‍ക്കു ശേഷം പ്രതി പിടിയില്‍

നാദാപുരം: മാസങ്ങള്‍ക്ക് മുമ്പ് അരൂര്‍ പ്രൈമറി ഹെല്‍ത്ത് സെന്ററില്‍നിന്നു കാണാതായ ടാബുകളുമായി കൊല്ലം സ്വദേശി അറസ്റ്റില്‍. കൊല്ലം നിലമേല്‍ സ്വദേശി സജി ഭവനില്‍ സാബു (28)വിനെയാണ് മോഷ്ടിച്ച ടാബുകളുമായി നാദാപുരം പൊലീസ് അറസ്റ്റു ചെയ്തത്. 2021 ഒക്ടോബറിലാണ് ആരോഗ്യ വിവര ശേഖരണത്തിന്റെ ഭാഗമായി ഹെല്‍ത്ത് സെന്ററില്‍ സൂക്ഷിച്ച 30,000 രൂപ വിലയുള്ള രണ്ടു ടാബുകള്‍ കാണാതായത്. തുടര്‍ന്ന് നാദാപുരം പൊലീസില്‍ പരാതി നല്‍കുകയായിരുന്നു. ആശുപത്രിയില്‍ ഇലക്ട്രിക്കല്‍ ജോലിക്കെത്തിയ സാബു അലമാരകളില്‍ സൂക്ഷിച്ച ടാബുകള്‍ മോഷ്ടിക്കുകയായിരുന്നു. മാസങ്ങള്‍ക്കു ശേഷം ഇതില്‍ ഒരു ടാബ് കിളിമാനൂരിലെ മൊബൈല്‍ കടയില്‍ 1500 രൂപയ്ക്ക് വില്‍ക്കുകയും ഷോപ്പുടമ ഈ ടാബ് മറ്റൊരാള്‍ക്ക് വില്‍ക്കുകയും ചെയ്തു. വാങ്ങിയ ആള്‍ ഇത് ഉപയോഗിച്ചതോടെയാണ് ലൊക്കേഷന്‍ കണ്ടെത്താന്‍ കഴിഞ്ഞത്. ഇതോടെ നാദാപുരം പൊലീസ് കിളിമാനൂരിലെത്തി യുവാവിനെ കസ്റ്റഡിയിലെടുത്ത് ചോദ്യം ചെയ്തു. ഇതോടെയാണ് അന്വേഷണം സാബുവിലെത്തിയത്. കാണാതായ രണ്ടാമത്തെ ടാബ് പ്രതിയുടെ വീട്ടില്‍ സൂക്ഷിച്ച നിലയില്‍ പൊലീസ് കണ്ടെത്തി. തുടര്‍ന്ന് കസ്റ്റഡിയിലെടുത്ത പ്രതിയെ നാദാപുരത്തെത്തിച്ച് അറസ്റ്റ് രേഖപ്പെടുത്തി. ആശുപത്രിയിലെത്തിച്ച് തെളിവെടുത്തു. ടാബുകള്‍ കാണാതായതിനു പിന്നില്‍ ആശുപത്രി ജീവനക്കാരാണ് എന്ന തരത്തില്‍ വ്യാജപ്രചരണം ചില ഭാഗങ്ങളില്‍ നിന്നുണ്ടായത് വന്‍ വിവാദങ്ങള്‍ക്കിടയാക്കിയിരുന്നു. അഡി.എസ്‌ഐ ഇ. പ്രശാന്ത്, എഎസ്‌ഐ മനോജ് രാമത്ത്, സിനിയര്‍ സിപിഒ കെ.കെ.ലതീഷ് എന്നിവരടങ്ങുന്ന സംഘമാണ് പ്രതിയെ വടകര സൈബര്‍ സെല്ലിന്റെ സഹായത്തോടെ പിടികൂടിയത്.