സോണിയയുടെ പഴ്‌സനല്‍ സെക്രട്ടറി പീഡിപ്പിച്ചെന്ന് യുവതി; കേസെടുത്തു

കോണ്‍ഗ്രസ് അധ്യക്ഷ സോണിയ ഗാന്ധിയുടെ പഴ്‌സനല്‍ സെക്രട്ടറി പി.പി.മാധവനെതിരെ ലൈംഗികാരോപണവുമായി യുവതി രംഗത്ത്. ജോലി നല്‍കാമെന്നും വിവാഹം ചെയ്യാമെന്നും വാഗ്ദാനം നല്‍കി ലൈംഗിക ചൂഷണത്തിന് ഇരയാക്കിയെന്നാണ് പരാതി. ഇരുപത്തിയാറുകാരിയുടെ പരാതിയുടെ അടിസ്ഥാനത്തില്‍ ഡല്‍ഹി പൊലീസ് പി.പി. മാധവനെതിരെ കേസ് റജിസ്റ്റര്‍ ചെയ്തു. ആരോപണം തികച്ചും അടിസ്ഥാനരഹിതമാണെന്നും ഇതിനു പിന്നില്‍ ഗൂഢാലോചനയുണ്ടെന്നും പി.പി.മാധവന്‍ പ്രതികരിച്ചു. എഴുപത്തിയൊന്നുകാരനായ മാധവന്‍ യുവതിയെ ലൈംഗിക പീഡനത്തിന് ഇരയാക്കിയതായും വിവരം പുറത്തുപറഞ്ഞാല്‍ കടുത്ത അനന്തര ഫലങ്ങള്‍ നേരിടേണ്ടി വരുമെന്ന് ഭീഷണിപ്പെടുത്തിയതായും പരാതിയിലുണ്ട്. 2020ല്‍ ഭര്‍ത്താവ് മരിച്ച യുവതി ഡല്‍ഹിയിലാണ് താമസം. യുവതിയുടെ ഭര്‍ത്താവ് കോണ്‍ഗ്രസ് പാര്‍ട്ടി ഓഫിസിലെ ജീവനക്കാരനായിരുന്നുവെന്നാണ് റിപ്പോര്‍ട്ട്. 'ജൂണ്‍ 25ന് ഉത്തം നഗര്‍ പൊലീസ് സ്റ്റേഷനില്‍ ഇതുമായി ബന്ധപ്പെട്ട് പരാതി ലഭിച്ചിട്ടുണ്ട്. ബലാത്സംഗത്തിനും ഭീഷണിപ്പെടുത്തിയതിനും കേസ് റജിസ്റ്റര്‍ ചെയ്തു. പരാതിയില്‍ അന്വേഷണം ആരംഭിച്ചു' - ദ്വാരക ഡെപ്യൂട്ടി പൊലീസ് കമ്മിഷണര്‍ എം.ഹര്‍ഷവര്‍ധന്‍ വ്യക്തമാക്കി.