കൊല്ലത്ത് വീട്ടമ്മയുടെ ആത്മഹത്യ വായ്പാ തട്ടിപ്പിനെ തുടര്‍ന്നെന്ന് പരാതി,ആരോപണം നേരിട്ട സ്ത്രീ ഒളിവില്‍

കൊല്ലം :കൊല്ലം അയത്തില്‍ വീട്ടമ്മ ആത്മഹത്യ ചെയ്തത് വായ്പാ തട്ടിപ്പിനെ തുടര്‍ന്നെന്ന് പരാതി. സ്വകാര്യ ബാങ്കില്‍ നിന്നെടുത്ത ലോണില്‍ ഇടനിലക്കാരി ഇവര്‍ അറിയാതെ കൂടുതല്‍ തുക തട്ടിയെടുത്തതായാണ് ആരോപണം. ഇടനിലക്കാരിയായ പോളയത്തോട് സ്വദേശി ലേഖ വഞ്ചിച്ചെന്നും, തന്നെ കടക്കാരിയാക്കിയെന്നുമാണ് വീട്ടമ്മയുടെ അത്മഹത്യകുറിപ്പില്‍ പറയുന്നത്. ഈ മാസം പത്തിനാണ് അയത്തില്‍ സ്വദേശി സജിനി വീട്ടിനുള്ളില്‍ തൂങ്ങി മരിച്ചത്. ആത്മഹത്യ കുറിപ്പിലൂടെയാണ് ലക്ഷങ്ങളുടെ തട്ടിപ്പ് വിവരം പുറം ലോകം അറിയുന്നത്. 2014 ല്‍ പോളയത്തോട് സ്വദേശിയായ ലേഖ പത്ത് പേരടങ്ങുന്ന വീട്ടമ്മമാരുടെ ചെറു സംഘങ്ങള്‍ രൂപീകരിച്ച് മൂന്ന് ലക്ഷം രൂപ സ്വകാര്യ ബാങ്കില്‍ നിന്നും ലോണെടുത്തു നല്‍കിയിരുന്നു. വായ്പയെടുത്ത പണം വീട്ടമ്മമാര്‍ കൃത്യമായി തിരിച്ചടക്കുകയും ചെയ്തു. എന്നാല്‍ തങ്ങള്‍ ചതിയില്‍ പെട്ടെന്ന് അവര്‍ തിരിച്ചറിഞ്ഞത് ഈയടുത്താണ്. ലോണെടുത്തതില്‍ ഇനിയും വലിയൊരു തുക തിരിച്ചടയ്ക്കാനുണ്ടെന്ന് കാട്ടി ബാങ്കില്‍ നിന്ന് നോട്ടീസ് വന്നു. ഇതോടെയാണ് വീട്ടമ്മമാരുടെ രേഖകള്‍ ഉപയോഗിച്ച് ഇടനിലക്കാരി ലേഖ വലിയ തുക ബാങ്കില്‍ നിന്ന് വായ്പ ഇനത്തില്‍ തട്ടിയെടുത്തതായി കണ്ടെത്തുന്നത്. ലേഖയെ വീട്ടമ്മമാര്‍ക്ക് പരിചയപ്പെടുത്തിയ സജിനി ഇതോടെ പ്രതിസന്ധിയിലായി. പലതവണ പ്രശ്‌നം പരിഹരിക്കണമെന്ന് സജിനി ആവശ്യപ്പെട്ടിട്ടും ലേഖ കൈ മലര്‍ത്തുകയും ഭീഷണിപ്പെടുത്തുകയും ചെയ്തു. സമ്മര്‍ദം സഹിക്കാനാവാതെ വന്നതോടെയാണ് ജീവനൊടുക്കിയതെന്നാണ് പരാതി. പത്ത് പേരടങ്ങുന്ന ആറ് സംഘങ്ങളായിരുന്നു ലേഖ തുടങ്ങിയത്. ലക്ഷങ്ങളാണ് ഇവരുടെ പേരില്‍ തട്ടിയെടുത്തത്. പറ്റിക്കപ്പെട്ടവരിലേറെയും കശുവണ്ടി തൊഴിലാളികള്‍. വീട്ടമ്മയുടെ ആത്മഹത്യക്ക് പിന്നാലെ ലേഖ ഒളിവില്‍ പോയി. കിളികൊല്ലൂര്‍ പൊലീസ് ഇവര്‍ക്കെതിരെ കേസ് എടുത്ത് അന്വേഷണം നടത്തി വരികയാണ്.