ബിജെപി സംസ്ഥാന അധ്യക്ഷന്റെ മകന്റെ നിയമനം, പരീക്ഷാ നടപടികളിലും തിരിമറിയെന്ന് ആക്ഷേപം, ലാബ് പരീക്ഷയും പ്രഹസനം!

ബിജെപി സംസ്ഥാന അധ്യക്ഷന്‍ കെ സുരേന്ദ്രന്റെ മകന് നിയമനം ലഭിച്ച രാജീവ് ഗാന്ധി സെന്റര്‍ ഫോര്‍ ബയോടെക്‌നോളജിയിലെ ടെക്‌നിക്കല്‍ ഓഫീസര്‍ തസ്തികയിലേക്ക് നടന്ന പരീക്ഷയുടെ നടപടികളെ കുറിച്ചും ആക്ഷേപം. മെക്കാനിക്കല്‍ എഞ്ചിനീയറിംഗ് ബിരുദം അടിസ്ഥാനപ്പെടുത്തി വിളിച്ച തസ്തികയുടെ രണ്ടാം ഘട്ട പരീക്ഷയുടെ ചോദ്യങ്ങള്‍ ഏറെയും ബയോടെക്‌നോളജി വിഷയത്തില്‍ നിന്നായിരുന്നുവെന്നാണ് ആക്ഷേപം. അവസാനഘട്ടമായി നടന്ന ലാബ് പരീക്ഷയും പ്രഹസനമായിരുന്നുവെന്ന് ഉദ്യോഗാര്‍ത്ഥികള്‍ പറഞ്ഞു. നിയമന വിവരങ്ങള്‍ മറ്റ് ഉദ്യോഗാര്‍ത്ഥികളുടെ മുന്നില്‍ മറച്ചുവച്ചു എന്നത് മാത്രമല്ല, എല്ലാ ചട്ടങ്ങളും പാലിച്ച് നടത്തിയെന്ന് പറയുന്ന പരീക്ഷയുടെ നടപടികളെ കുറിച്ചും ഉയരുന്നത് സംശയങ്ങള്‍. ടയര്‍ വണ്‍ പരീക്ഷയില്‍ ആകെ നൂറ് ചോദ്യങ്ങള്‍, ശരി ഉത്തരത്തിന് രണ്ട് മാര്‍ക്ക്, തെറ്റിയാല്‍ അരമാര്‍ക്ക് കുറയ്ക്കും. ആദ്യഘട്ട പരീക്ഷയില്‍ ജനറല്‍ അവയര്‍നസ്, അഭിരുചി അടക്കമുള്ള വിഷയങ്ങളാണ് ചോദ്യമായി നല്‍കിയത്. ഇനിയാണ് ട്വിസ്റ്റ്. ഉച്ചയ്ക്ക് ശേഷം നടന്ന രണ്ടാംഘട്ടം എഴുത്ത് പരീക്ഷയില്‍ പത്ത് ചോദ്യങ്ങള്‍, അഞ്ച് എണ്ണത്തിന് ഉത്തരം എഴുതണം. ചോദ്യങ്ങള്‍ തസ്തികയുടെ യോഗ്യതയ്ക്ക് അനുസരിച്ചെന്നായിരുന്നു പരീക്ഷാ വിജ്ഞാപനത്തില്‍ വ്യക്തമാക്കിയിരുന്നത്. എന്നാല്‍ ചോദ്യങ്ങളെ കുറിച്ച്, പരീക്ഷ എഴുതിയ മെക്കാനിക്കല്‍ ബിരുദധാരിയായ ഉദ്യോഗാര്‍ത്ഥികള്‍ക്ക് പറയാനുള്ളത് പരാതികള്‍. തീര്‍ന്നില്ല. 48 പേരെ എഴുത്ത് പരീക്ഷയ്ക്ക് തെരഞ്ഞെടുത്ത ശേഷം അവസാനം റൗണ്ടായ പ്രാക്ടിക്കല്‍ പരീക്ഷയ്ക്ക് തെരഞ്ഞെടുത്തത് നാലു പേരെ മാത്രം. മാര്‍ക്കിന്റെ അടിസ്ഥാനത്തിലാണ് നാലു പേരെ തെരഞ്ഞെടുത്തതെന്ന് ആര്‍ജിസിബി വിശദീകരിക്കുന്നു. എന്നാല്‍ ചുരുങ്ങിയ ആളുകളിലേക്ക് എണ്ണം ഒതുക്കിയതിലും ദൂരൂഹതയുണ്ടെന്നാണ് ആരോപണം. നാലു പേര്‍ മാത്രമാക്കി പട്ടിക ചുരുക്കിയ ശേഷം നടത്തിയ പ്രാക്ടിക്കല്‍ പരീക്ഷയെ കുറിച്ചും ആക്ഷേപമുണ്ട്. പരീക്ഷ, പ്രാക്ടിക്കല്‍ പരീക്ഷ എന്നിവയുടെ ഫലത്തിന്റെ അടിസ്ഥാനത്തിലാണ് നിയമനമെന്നാണ് ആര്‍ജിസിബി വിശദീകരിക്കുന്നത്. ട്രേഡിന് പുറത്തുള്ള ചോദ്യങ്ങള്‍ അടിസ്ഥാനപ്പെടുത്തി എഴുത്ത് പരീക്ഷ. പിന്നാലെ ആദ്യഘട്ടപട്ടികയില്‍ നിന്ന് നാല് പേരിലേക്ക് മാത്രം ചുരുക്കി പ്രാക്ടിക്കല്‍ പരീക്ഷ. ഒടുവില്‍ ബിജെപി സംസ്ഥാന അധ്യക്ഷന്റെ മകന് നിയമനവും. ഏതായാലും നടപടി ക്രമങ്ങള്‍ പാലിച്ചെന്ന് വിശദീകരിക്കുന്ന നിയമനത്തില്‍ ബാഹ്യ ഇടപെടലിനുള്ള സാധ്യത തള്ളാനാകാത്ത തരത്തില്‍ ദുരൂഹതയും സംശയങ്ങളും ബാക്കിയാണ്.