അതിരുതർക്കത്തെ തുടർന്ന് അയൽവാസി വീട്ടമ്മയെ വെട്ടി പരിക്കേൽപ്പിച്ചു

തിരുവനന്തപുരത്ത് അതിരുതർക്കത്തെ തുടർന്ന് അയൽവാസി വീട്ടമ്മയെ വെട്ടി പരിക്കേൽപ്പിച്ചു. മാമം ശീവേലിക്കോണം എം.ബി. ഭവനിൽ പ്രതിഭാകുമാരിക്കാണ് (55)​ വെട്ടേറ്റത്. സംഭവവുമായി ബന്ധപ്പെട്ട് അയൽവാസിയായ വിജയനെ (58)​ ആറ്റിങ്ങൽ പൊലീസ് കസ്റ്റഡിയിലെടുത്തു. തിങ്കളാഴ്ച ഉച്ചയ്ക്ക് 12.30 ഓടെയാണ് സംഭവം. മതിൽ കെട്ടുന്നതു സംബന്ധിച്ച തർക്കത്തെ തുടർന്ന് ഇരുവരും തമ്മിൽ വാക്കേറ്റം നടന്നു. തുടർന്ന് വിജയൻ വടിവാളുകൊണ്ട് പ്രതിഭാകുമാരിയെ വെട്ടുകയായിരുന്നു. ഇവർ വലിയകുന്ന് താലൂക്ക് ആശുപത്രിയിൽ ചികിത്സയിലാണ്. സംഭവത്തിൽ കേസെടുത്തതായി എസ്.ഐ സെന്തിൽകുമാർ പറഞ്ഞു.