പഞ്ചാബിലും ഗോവയിലും ഇന്നു ജനവിധി

പഞ്ചാബിലും ഗോവയിലും ഇന്നു ജനവിധി. ദേശീയ രാഷ്‌ട്രീയത്തില്‍ ദിശാസൂചകമായി മാറുമെന്നു വിലയിരുത്തപ്പെടുന്ന അഞ്ചു സംസ്‌ഥാനങ്ങളിലെ നിയമസഭാ തെരഞ്ഞെടുപ്പിന്റെ ആദ്യ ഘട്ടമാണ്‌ ഇന്നത്തെ വോട്ടെടുപ്പ്‌. രണ്ടു സംസ്‌ഥാനങ്ങളിലെയും മുഴുവന്‍ മണ്ഡലങ്ങളിലെയും വോട്ടര്‍മാര്‍ ഇന്നു ബൂത്തിലെത്തും. രാവിലെ ഏഴു മുതല്‍ വൈകിട്ട്‌ അഞ്ചു വരെയാണു പോളിങ്‌. ഗോവയില്‍ ബി.ജെ.പിയും പഞ്ചാബില്‍ ബി.ജെ.പി - ശിരോമണി അകാലിദള്‍ സഖ്യവുമാണ്‌ അധികാരത്തിലുള്ളത്‌. കോണ്‍ഗ്രസുമായി നേരിട്ട്‌ ഏറ്റുമുട്ടല്‍ നടന്നിരുന്ന ഇവിടങ്ങളില്‍ ഇക്കുറി ആം ആദ്‌മി പാര്‍ട്ടിയുടെ സാന്നിധ്യം ശ്രദ്ധേയമാണ്‌. ശക്‌തമായ ത്രികോണ മത്സരത്തിനാണ്‌ അരങ്ങൊരുങ്ങിയിരിക്കുന്നത്‌. പഞ്ചാബില്‍ കോണ്‍ഗ്രസിനും ആം ആദ്‌മി പാര്‍ട്ടിക്കും സാധ്യത പ്രവചിക്കുന്ന സര്‍വേകള്‍ ഗോവയില്‍ തൂക്കുസഭയാണു പ്രവചിച്ചത്‌. രണ്ടു സംസ്‌ഥാനത്തും സുരക്ഷ ശക്‌തമാക്കിയിട്ടുണ്ട്‌. തെരഞ്ഞെടുപ്പു പ്രചാരണത്തിനിടെ സ്‌ഫോടനമുണ്ടായ പഞ്ചാബില്‍ 200 കമ്പനി അര്‍ധസൈനികരെ വിന്യസിച്ചിട്ടുണ്ട്‌. 11 ലക്ഷം വോട്ടര്‍മാരുള്ള ഗോവയിലെ 1,642 പോളിങ്‌ ബൂത്തുകളിലും തല്‍സമയ വെബ്‌കാസ്‌റ്റിങ്‌ ഉണ്ടാകും. സ്‌ത്രീകള്‍ മാത്രം ചുമതലയിലുള്ള പിങ്ക്‌ ബൂത്തുകളാണ്‌ ഗോവയിലെ മറ്റൊരു സവിശേഷത.