തൊഴിൽ മന്ത്രാലയത്തിലെ കമ്പ്യൂട്ടറില്‍ വൈറസ് ആക്രമണം : വർക്ക് പെർമിറ്റ് പുതുക്കാൻ സാധിക്കാത്തവരെ മന്ത്രാലയം പിഴയിൽ നിന്ന് ഒഴിവാക്കി

സൗദിയിൽ തൊഴിൽ സാമൂഹിക വികസന മന്ത്രാലയത്തിന്റെ കമ്പ്യൂട്ടർ സിസ്റ്റം വൈറസ് ആക്രമണത്തിൽ പ്രവർത്തന രഹിതമായതിനെ തുടർന്ന് നിശ്ചിത സമയത്ത് വർക്ക് പെർമിറ്റ് പുതുക്കാൻ സാധിക്കാത്തവരെ മന്ത്രാലയം പിഴയിൽ നിന്ന് ഒഴിവാക്കി . കമ്പ്യൂട്ടർ സിസ്റ്റം പ്രവർത്തന രഹിതമായതുമൂലം നിരവധി തൊഴിലാളികൾക്ക് വർക്ക് പെർമിറ്റ് പുതുക്കുന്നതിന് കാലതാമസം നേരിട്ടിരുന്നു .ഇത് സംബന്ധിച്ച് സൗദി കൗൺസിൽ ഓഫ് ചേംബേഴ്‌സിന് കീഴിലെ ദേശീയ വാണിജ്യ കമ്മറ്റി തൊഴിൽ സാമൂഹിക വികസന മന്ത്രാലയത്തെ രേഖാമൂലം അറിയിച്ചിരുന്നു . വർക്ക് പെർമിറ്റ് പുതുക്കുന്നതിന് കാലതാമസം വരുത്തിയതിനു തൊഴിലുടമകളിൽ നിന്ന് മന്ത്രാലയം പിഴകൾ ഈടാക്കിയിരുന്നു .തങ്ങളുടേതല്ലാത്ത കാരണത്താൽ ചുമത്തപ്പെട്ട പിഴ ഒഴുവാക്കുന്നതിന് നടപടികൾ സ്വീകരിക്കണമെന്ന് സ്വകാര്യ മേഖലാ സ്ഥാപനഉടമകൾ മന്ത്രാലയത്തോട് ആവശ്യപ്പെട്ടിരുന്നു .ഇതിനെ തുടർന്നാണ് മന്ത്രാലയം പിഴയിൽ നിന്ന് വർക്ക് പെർമിറ്റുകാരെ ഒഴിവാക്കിയത് . എന്നാൽ ഇഖാമ പുതുക്കുന്നതിന് വീഴ്‌ച വരുത്തിയിട്ടുള്ളവരെ പിഴ ഈടാക്കുന്നതിൽ നിന്ന് പാസ്പോർട്ട് ഒഴിവാക്കിയിട്ടില്ല .ലേബർ ഓഫീസിൽ നിന്നും വർക്ക് പെർമിറ്റ് പുതുക്കാതെ പാസ്പോർട്ട് നിന്ന് ഇഖാമ പുതുക്കുന്നതിന് സാധിക്കില്ല .