തന്നെ വിമര്‍ശിക്കുന്നതില്‍ കാണിക്കുന്ന ശ്രദ്ധ പരിപാടി നടത്തുന്നതില്‍ കാണിച്ചിരുന്നെങ്കില്‍ ഓസ്‌കാര്‍ വേദിയില്‍ തെറ്റുപറ്റില്ലായിരുന്നു :ട്രംമ്പ്

തന്നെ അമിതമായി വിമര്‍ശിച്ചതാണ് ഓസ്‌കാര്‍ വേദി അബദ്ധ വേദിയായി മാറാന്‍ കാരണമെന്ന് ഡൊണാള്‍ഡ് ട്രംമ്പ്.വിമര്‍ശിക്കുന്നതില്‍ കാണിച്ച ശ്രദ്ധ പരിപാടിയില്‍ കാണിച്ചിരുന്നെങ്കില്‍ മികച്ച സിനിമയുടെ പ്രഖ്യാപനം മാറിപ്പോകില്ലായിരുന്നു എന്നദ്ദേഹം പറഞ്ഞു.വളരെ മികച്ചതായി നടത്തേണ്ട ഒരു പരിപാടിയുടെ ശോഭ മങ്ങിയത് കഷ്ടമായിപ്പോയി.ഓസ്‌കാര്‍ ചരിത്രത്തില്‍ തന്നെ ഇത്തരത്തിലൊരു പറ്റ് ആദ്യമാണ്.എന്തോഒരു കുറവുണ്ടായിരുന്നു,പരിപാടിയ്ക്ക് ശോഭ നഷ്ടമായത് കഷ്ടമാണെന്നും അദ്ദേഹം പറഞ്ഞു.

ചരിത്രത്തിലാദ്യമായി ഓസ്‌കാര്‍ വേദിയില്‍ മികച്ച ചിത്രത്തിനുള്ള അവാര്‍ഡ് പ്രഖ്യാപിച്ചത് തെറ്റായിട്ടായിരുന്നു.ലാലാലാന്‍ഡ് എന്ന ചിത്രത്തിനാണ് അവാര്‍ഡെന്നാണ് ആദ്യം പ്രഖ്യാപനം വന്നത്.ഈ സിനിമയുടെ അണിയറ പ്രവര്‍ത്തകര്‍ അവാര്‍ഡ് വേദിയിലെത്തി അവാര്‍ഡ് കൈപ്പറ്റുകയും വികാരഭരിതമായി സംസാരിക്കുകയും ചെയ്തിരുന്നു.പിന്നീടാണ് അവതാരകര്‍ക്ക് അബദ്ധം മനസിലാകുന്നത്.ദ മൂണ്‍ലൈറ്റിനായിരുന്നു മികച്ച ചിത്രത്തിനുള്ള ഓസ്‌കാര്‍ പുരസ്‌ക്കാരം

ട്രംമ്പിന്റെ നയങ്ങളോടുള്ള അമിതമായ വെറുപ്പ് ഓസ്‌കാര്‍ അവാര്‍ഡ് നിശയില്‍ പ്രകടമായിരുന്നു.മുഖ്യ അവതാരകന്‍ വേദിയിലെത്തിയപ്പോള്‍ തന്നെ ട്രംമ്പിനെതിരെ വിമര്‍ശനങ്ങളോടെയാണ് തുടങ്ങിയത്.ചടങ്ങിനെത്തിയവര്‍ ട്രംമ്പിന്റെ വീസാ വിലക്കിനെയും കുടിയേറ്റ നിയന്ത്രണത്തേയും വലിയ തോതില്‍ വിമര്‍ശിച്ചു.