കറന്‍സി വിനിയോഗത്തിന്റെ പരിധി രണ്ട് ലക്ഷം : ലക്ഷ്യം കള്ളപ്പണ നിയന്ത്രണം

കറന്‍സി ഇടപാടുകളുടെ പരിധി കേന്ദ്രസര്‍ക്കാര്‍ വീണ്ടും കുറയ്ക്കുന്നു. കറന്‍സി ഇടപാടുകളുടെ പരിധി രണ്ട് ലക്ഷം രൂപയായി കുറയ്ക്കാനാണ് നീക്കം. കഴിഞ്ഞ കേന്ദ്ര ബജറ്റിലാണ് കറന്‍സി ഇടപാടുകളുടെ പരിധി മൂന്ന് ലക്ഷം രൂപയായി കുറച്ചത്. പരിധി രണ്ട് ലക്ഷം രൂപയാക്കുന്നതിനുള്ള നിര്‍ദ്ദേശം ചൊവ്വാഴ്ചയാണ് കേന്ദ്രസര്‍ക്കാര്‍ അവതരിപ്പിച്ചത്. ഇതിനായി ധനബില്ല് ഭേദഗതി ചെയ്യും.

കള്ളപ്പണം നിയന്ത്രിക്കുന്നതിനാണ് പരിധി വീണ്ടും കുറയ്ക്കുന്നത്. പരിധിക്ക് മുകളിലുള്ള കറന്‍സി ഇടപാടുകള്‍ ശിക്ഷാര്‍ഹമായിരിക്കും. കള്ളപ്പണം തിരികെ കൊണ്ടുവരുന്നതിന് കേന്ദ്രസര്‍ക്കാര്‍ നിയമിച്ച പ്രത്യേക അന്വേഷണ സംഘത്തിന്റെ ശിപാര്‍ശ പ്രകാരമാണ് കറന്‍സി ഇടപാടിന്റെ പരിധി കുറയ്ക്കുന്നത്.