ഏഷ്യയിലെ ഏറ്റവും വലിയ ടണല്‍ ഏപ്രില്‍ രണ്ടിനു പ്രധാനമന്ത്രി രാജ്യത്തിനു സമര്‍പ്പിക്കും

ഏഷ്യയിലെ ഏറ്റവും നീളമേറിയ റോഡ്‌ ടണല്‍ ഏപ്രില്‍ രണ്ടിന്‌ പ്രധാനമന്ത്രി നരേന്ദ്രമോഡി രാജ്യത്തിനു സമര്‍പ്പിക്കും. ജമ്മുവില്‍നിന്ന്‌ ശ്രീനഗറിലേക്കുള്ള യാത്രാദൈര്‍ഘ്യം രണ്ടുമണിക്കൂറിലേറെ കുറയ്‌ക്കുമെന്നു കരുതുന്ന ടണല്‍ ഇരുവശത്തേക്കും ഇരട്ടപ്പാതയുള്ള വമ്പന്‍ പദ്ധതിയാണ്‌. ജമ്മു കശ്‌മീരിലെ ഉദംപൂരിനും റമ്പാനും മധ്യേയുള്ള ടണലിന്റെ ദൂരം 10.89 കിലോമീറ്ററാണ്‌.

ലോകോത്തര നിലവാരമുള്ള സംവിധാനങ്ങളുമായി 2516 കോടി രൂപ ചെലവിട്ടാണു ടണല്‍ നിര്‍മിച്ചത്‌. എല്ലാ കാലവസ്‌ഥയ്‌ക്കും അനുയോജ്യമായ ടണല്‍ ജമ്മു കശ്‌മീരിലെ മലനിരകളില്‍ നാലുവര്‍ഷം കൊണ്ടു റെക്കോഡ്‌ വേഗത്തിലാണു പൂര്‍ത്തിയാക്കിയതെന്നു കേന്ദ്ര റോഡ്‌ ഗതാഗത ഹൈവേ മന്ത്രി നിധിന്‍ ഗഡ്‌കരി പറഞ്ഞു. ടണല്‍ ജമ്മുവില്‍നിന്നു ശ്രീനഗറിലേയ്‌ക്കുള്ള ദൂരം 41 കിലോമീറ്ററായി കുറയ്‌ക്കുമെന്നും ദിനംപ്രതി 27 ലക്ഷം രൂപയുടെ ഇന്ധനലാഭം സൃഷ്‌ടിക്കുമെന്നും ഗഡ്‌കരി അവകാശപ്പെട്ടു. ഏതുതരത്തിലുള്ള സുരക്ഷാഭീഷണിയെയും നേരിടുന്നതിനുള്ള അത്യാധുനിക സ്‌കാനറുകളുടെ സഹായത്തോടെയാണു ടണല്‍ നിര്‍മിച്ചിട്ടുള്ളത്‌. ജമ്മു ശ്രീനഗര്‍ ദേശീയപാതയായ എന്‍.എച്ച്‌. 44ന്റെ വീതികൂട്ടുന്നതിന്റെ ഭാഗമായുള്ള പദ്ധതിയാ ടണല്‍ ഇന്ത്യയിലെ ഏറ്റവും വലിയ ഹൈവേ ടണല്‍ എന്നതിനുപുറമേ ഏഷ്യയിലേയും ഏറ്റവും വലിയ ദ്വിദശാ റോഡ്‌ ടണലാണ്‌.