ഓസ്‌ട്രേലിയ ഡെബ്ബി ചുഴലിക്കാറ്റ് ഭീതിയില്‍ ; 3,500 ഓളം പേരെ പ്രദേശത്തുനിന്ന് മാറ്റിപ്പാര്‍പ്പിച്ചു

ഓസ്‌ട്രേലിയ ഡെബ്ബി ചുഴലിക്കാറ്റ് ഭീതിയില്‍. ചൊവ്വാഴ്ച പുലര്‍ച്ചെയോടെ ക്യൂന്‍സ്ലാന്‍ഡ് തീരത്തുകൂടി ചുഴലിക്കാറ്റ് കടന്നുപോകുമെന്നാണ് പ്രവചനം. കാറ്റഗറി 4 ഇനത്തില്‍പെടുന്ന ഡെബ്ബി മണിക്കൂറില്‍ 240 കിലോമീറ്റര്‍ വേഗതയിലായിരിക്കും വീശിയടിക്കുക. മുന്‍കരുതല്‍ എന്ന നിലയില്‍ 3,500 ഓളം പേരെ പ്രദേശത്തുനിന്ന് മാറ്റിപ്പാര്‍പ്പിച്ചു.

കാറ്റിനെ തുടര്‍ന്ന് ശക്തമായമഴയും മണ്ണിടിച്ചിലും ഉണ്ടായേക്കുമെന്നും കാലാവസ്ഥ നിരീക്ഷണ കേന്ദ്രം മുന്നറിയിപ്പ് നല്‍കി. ക്വീന്‍സ്‌ലാന്‍ഡിലെ 102 സ്‌കൂളുകള്‍ക്കും 81 നഴ്‌സറി സ്‌കൂളുകള്‍ക്കും സര്‍ക്കാര്‍ അവധി നല്‍കി. രണ്ട് തുറമുഖങ്ങള്‍ അടച്ചു. ടൗണ്‍സ്‌വില്ലെ, മാക്കേ വിമാനത്താവളങ്ങളില്‍ നിന്നുള്ള എല്ലാ സര്‍വീസുകളും റദ്ദാക്കിയിട്ടുണ്ട്. കാറ്റിനെ നേരിടാന്‍ ജനങ്ങളും മുന്‍കരുതല്‍ സ്വീകരിച്ചു തുടങ്ങി. ഭക്ഷ്യവസ്തുക്കും മറ്റും ആവശ്യത്തിന് സംഭരിക്കുന്നതിനുള്ള തിരക്കിലാണ് ജനങ്ങള്‍. മിക്ക ഷോപ്പുകളും ഇതിനകം തന്നെ കാലിയായി.