റവന്യൂമന്ത്രി ഇ.ചന്ദ്രശേഖരന്റെ മുഖത്തുനോക്കി സുനില്‍ കുമാര്‍ അല്ലേ എന്ന് ഡി.ജി.പി ; ഇന്റലിജന്‍സ് മേധാവിക്ക് നാടുഭരിക്കുന്ന മന്ത്രിമാരെ പോലും തിരിച്ചറിയാന്‍ കഴിയുന്നില്ല..!

റവന്യൂമന്ത്രി ഇ.ചന്ദ്രശേഖരന്റെ മുഖത്തുനോക്കി സുനില്‍ കുമാര്‍ അല്ലേ എന്ന് ഡി.ജി.പി ചോദിച്ചു.സംസ്ഥാന ഇന്റലിജന്‍സ് മേധാവിക്ക് നാടുഭരിക്കുന്ന മന്ത്രിമാരെ പോലും തിരിച്ചറിയാന്‍ കഴിയുന്നില്ല. കൃഷിമന്ത്രി വി.എസ് സുനില്‍കുമാറിനെ കാണാനായി പുറപ്പെട്ട ഡി.ജി.പി മുഹമ്മദ് യാസിന്‍ എത്തിയത് റവന്യൂമന്ത്രിയുടെ വീട്ടില്‍.

രാവിലെ ഔദ്യോഗിക വാഹനത്തിലാണ് യാസിന്‍ റവന്യൂമന്ത്രിയുടെ വീട്ടിലെത്തിയത്. മന്ത്രിയെ കാണണമെന്ന് അറിയിച്ചതോടെ മന്ത്രി വീടിനു പുറത്തിറങ്ങി. 'കൃഷിമന്ത്രി സുനില്‍കുമാര്‍' അല്ലേ എന്ന് മന്ത്രിയോട് ചോദിക്കുകയും ചെയ്തു. മന്ത്രിമാരെ പോലും തിരിച്ചറിയാന്‍ കഴിയാത്തയാളാണോ ഇന്റലിജന്‍സ് മേധാവി എന്ന് പരസ്യമായി അതൃപ്തിയും മന്ത്രി പ്രകടിപ്പിച്ചു. താന്‍ വിളിച്ചിട്ടല്ല ഡി.ജി.പി വന്നതെന്നും മന്ത്രി മാധ്യമങ്ങളോട് പ്രതികരിച്ചു.

തൃശൂരിലെ ഒരു വിഷയവുമായി ബന്ധപ്പെട്ട് സുനില്‍കുമാറിന്റെ മുന്‍കൂര്‍ അനുമതി വാങ്ങിയ ശേഷമാണ് മുഹമ്മദ് യാസിന്‍ തിരുവനന്തപുരത്ത് എത്തിയത്. രാവിലെ എട്ടു മണിക്കായിരുന്നു കൂടിക്കാഴ്ചയ്ക്ക് സമയം നിശ്ചയിച്ചിരുന്നത്. അതേസമയം, തന്റെ ഡ്രൈവര്‍ക്ക് വീട് തെറ്റിയതാണെന്ന വിശദീകരണമാണ് മുഹമ്മദ് യാസിന്‍ നല്‍കുന്നത്. തനിക്ക് എല്ലാ മന്ത്രിമാരേയും തിരിച്ചറിയാം. കൃഷിമന്ത്രിയുടെ വീട് തന്നെയാണോ എന്ന് സ്ഥിരീകരിക്കാനാണ് താന്‍ ചോദിച്ചതെന്നും മുഹമ്മദ് യാസിന്‍ പറയുന്നു.