ജനങ്ങളെ ബുദ്ധിമുട്ടിച്ച് കയ്യേറ്റം ഒഴിപ്പിക്കാമെന്ന് ഉദ്യോഗസ്ഥര്‍ കരുതേണ്ടെന്ന് മന്ത്രി എം.എം. മണി

മൂന്നാര്‍ കയ്യേറ്റവിഷയവുമായി ബന്ധപ്പെട്ട് സി.പി.ഐക്കും മാധ്യമങ്ങള്‍ക്കും താക്കീതുമായി മന്ത്രി എം.എം. മണി രംഗത്തെത്തി. ജനങ്ങളെ ബുദ്ധിമുട്ടിച്ച് കയ്യേറ്റം ഒഴിപ്പിക്കാമെന്ന് ഉദ്യോഗസ്ഥര്‍ കരുതേണ്ടെന്ന് മന്ത്രി വ്യക്തമാക്കി. കയ്യേറ്റം ഒഴിപ്പിക്കുന്നതിനായി എത്തുന്ന ഉദ്യോഗസ്ഥരെ ജനം കൈകാര്യം ചെയ്താല്‍ സര്‍ക്കാരിനെ കുറ്റപ്പെടുത്തിയിട്ടു കാര്യമില്ലെന്നും അദ്ദേഹം പറഞ്ഞു. വണ്ണപ്പുറത്ത് സി.പി.എം ലോക്കല്‍ കമ്മിറ്റി ഓഫിസ് ഉദ്ഘാടനം ചെയ്ത് സംസാരിക്കവേയാണ് മണിയുടെ പ്രതികരണം. ഇടതുമുന്നണി ഒരു വകുപ്പും ആര്‍ക്കും തീറെഴുതി കൊടുത്തിട്ടില്ലെന്നും പ്രത്യേക അജന്‍ഡയോടെയാണ് മൂന്നാര്‍ വിഷയത്തില്‍ മാധ്യമങ്ങളുടെ ഇടപെടലെന്നും മണി ആരോപിച്ചു. സി.പി.ഐയെ പേരെടുത്ത് പരാമര്‍ശിക്കാതെയായിരുന്നു മണിയുടെ പ്രസംഗം. ഇന്ന് ദേവികുളത്ത് കയ്യേറ്റം ഒഴിപ്പിക്കാനെത്തിയ റവന്യു വകുപ്പ് സംഘത്തെ സി.പി.എം പ്രവര്‍ത്തകര്‍ തടഞ്ഞതിന്റെ പശ്ചാത്തലത്തിലാണ് മണിയുടെ പ്രസംഗം.