വ്യോമാക്രമണത്തില്‍ മലയാളികള്‍ ഉള്‍പ്പടെ 13 ഇന്ത്യന്‍ ഐഎസ് ഭീകരര്‍ കൊല്ലപ്പെട്ടു

അമേരിക്കയുടെ വ്യോമാക്രമണത്തില്‍ കൊല്ലപ്പെട്ട 90ലേറെ ഐഎസ് ഭീകരരില്‍ 13 ഇന്ത്യന്‍ ഐഎസ് ഭീകരരും. ഇവരില്‍ 5 പേര്‍ മലയാളികളാണെന്നും സൂചനയുണ്ട്. നംഗര്‍ഹാറില്‍ അമേരിക്ക നടത്തിയ ബോംബാക്രമണം അഫ്ഗാനിസ്ഥാന്‍ സ്ഥിതീകരിച്ചു. കേരളത്തില്‍ നിന്നു സംശയാസ്പദമായ സാഹചര്യത്തില്‍ കാണാതാവുകയും പിന്നീട് ഐഎസില്‍ ചേര്‍ന്നെന്ന് കരുതപ്പെടുകയും ചെയ്യുന്നവര്‍ എത്തിപ്പെട്ടിരിക്കുന്നെന്ന് കരുതുന്ന സ്ഥലമാണ് നംഗര്‍ഹര്‍.

ആക്രമണം നടക്കുന്ന സമയത്ത് മലയാളികളുള്‍പ്പെടെയുള്ള ഇന്ത്യന്‍ ഐഎസ് ഭീകരരും സ്ഥലത്തുണ്ടായിരുന്നെന്നും ഇവര്‍ കൊല്ലപ്പെട്ടിട്ടുണ്ടെന്നും അഫ്ഗാനിസ്ഥാന്‍ അറിയിച്ചു. കൊല്ലപ്പെട്ടവരെക്കുറിച്ചുള്ള കൂടുതല്‍ വിവരങ്ങള്‍ ലഭിക്കാന്‍ എന്‍ഐഎ ഇന്റര്‍പോളിന്റെ സഹായം തേടി.