വരുന്നു കൃത്രിമ മഴ വില 4500 കോടി

പി എസ് രാജേഷ്

അരിവില കുറയ്ക്കാന്‍ കാശില്ലാത്ത സര്‍ക്കാര്‍ 4500 കോടി രൂപ മുടക്കി കേരളത്തില്‍ മഴ പെയ്യിക്കുന്നു . ഇത് ചിലവാക്കി മേയ് മാസത്തില്‍കേരളമൊട്ടകെ മഴപെയ്യിക്കാനുള്ള പദ്ധതിയാണ് അണിയറിയില്‍ ഒരുങ്ങുന്നത്. മുഖ്യമന്ത്രി പിണറായി വിജയന്‍ നിയമസഭയില്‍ നടത്തിയ പ്രഖ്യാപനത്തെ തുടര്‍ന്നാണ് കൊടുംവരള്‍ച്ചയും വൈദ്യുതിക്ഷാമവും നേരിടാന്‍ മേയ് പത്തിനകം സംസ്ഥാനത്ത് കൃത്രിമമഴ പെയ്യിക്കാന്‍ സര്‍ക്കാര്‍ ഒരുങ്ങുന്നത്.

ആദ്യഘട്ടമായി. ഇടുക്കി അണക്കെട്ടിന്റെ ആള്‍പ്പാര്‍പ്പില്ലാത്ത വൃഷ്ടിപ്രദേശങ്ങളില്‍ ഐ.എസ്.ആര്‍.ഒയും പൂനെയിലെ ഇന്ത്യന്‍ഇന്‍സ്റ്റിറ്റ്യൂട്ട് ഒഫ് ട്രോപ്പിക്കല്‍ മെറ്ററോളജിയും കൃത്രിമമഴ പെയ്യിക്കാനുള്ള പരീക്ഷണം തുടങ്ങിക്കഴിഞ്ഞു. ആന്ധ്രയിലും കര്‍ണാടകത്തിലും കൃത്രിമമഴ പെയ്യിച്ച ഉദ്യോഗസ്ഥരുടെ സഹായവുമുണ്ട്.

ഐ.എസ്.ആര്‍.ഒയുടെ ഡോപ്ലര്‍ റഡാറുപയോഗിച്ച് മഴമേഘങ്ങളെ കണ്ടെത്തി ഫ്‌ലെയര്‍ എന്നറിയപ്പെടുന്ന ചെറുറോക്കറ്റുകളില്‍ രാസവസ്തുക്കള്‍ വിതറിയാവും കൃത്രിമമഴ പെയ്യിക്കുക. കെ.എസ്.ഇ.ബിയാണ് കൃത്രിമമഴയ്ക്കായി പണംമുടക്കുക. രാസവസ്തുക്കള്‍ വിതറിപത്തുമിനിറ്റിനകം മഴ പെയ്യുമെന്നാണ് ഉദ്യോഗസ്ഥര്‍ പറയുന്നത്.

ഇതിനായി സ്ഥിരം സംവിധാനമുണ്ടാക്കാന്‍ മുഖ്യമന്ത്രി പിണറായിവിജയന്‍ ശാസ്ത്രസാങ്കേതികവകുപ്പിന് നിര്‍ദ്ദേശം നല്‍കിയിട്ടുണ്ട്. അന്താരാഷ്ട്ര കമ്പനികളെ ഉള്‍പ്പെടുത്തി ആഗോളകരാര്‍ വിളിക്കാനുള്ള നടപടികളും തുടങ്ങി.