പെയിന്റില്‍ മുങ്ങിയത് കോടികള്‍,ബഹ്‌റയുടെ പണി പാളി

സംസ്ഥാന പൊലീസ് സ്റ്റേഷനുകള്‍ക്കു മുഴുവന്‍ ഒരേ കമ്പനിയുടെ ഒരേനിറം പെയിന്റടിക്കാനുള്ള മുന്‍ ഡിജിപിയും ഇപ്പോഴത്തെ വിജിലന്‍സ് തലവനുമായ ലോക്‌നാഥ് ബഹ്‌റയ്‌ക്കെതിരെ തിരുവനന്തപുരം വിജിലന്‍സ് കോടതിയില്‍ പരാതി.ഈ ഉത്തരവില്‍ 500 കോടി രൂപയുടെ അഴിമതി നടന്നിട്ടുണ്ടെന്നാണ് ബഹ്‌റയ്‌ക്കെതിരെ കോടതിയില്‍ സമര്‍പ്പിച്ച ഹര്‍ജിയില്‍ ആരോപിക്കുന്നത്. എന്തിനാണ് സംസ്ഥാനത്തെ പൊലീസ് സ്റ്റേഷനുകള്‍ക്കു മുഴുവന്‍ ഒരേ നിറം നല്‍കുന്നതെന്ന് പരാതി ഫയലില്‍ സ്വീകരിച്ച കോടതി ചോദിച്ചു .ഒരേ നിറം നല്‍കേണ്ടത് സാധാരണക്കാരന്‍ നിത്യ സന്ദര്‍ശകനായ റേഷന്‍കടകള്‍ക്കാണെന്നും കോടതി പരാതി ഫയലില്‍ സ്വീകരിച്ച് പറഞ്ഞു.

സംസ്ഥാന പൊലീസ് മേധാവി സ്ഥാനം ഒഴിയുന്നതിനു രണ്ടു ദിവസം മുമ്പാണ് അഞ്ഞൂറോളം സ്റ്റേഷനുകളില്‍ ഒരു കമ്പനിയുടെ ഒലീവ് ബ്രൗണ്‍ നിറം പെയിന്റ് അടിക്കണമെന്ന സര്‍ക്കുലര്‍ ബെഹ്‌റ ഇറക്കിയത്. എന്നാല്‍ ഇത്തരം സര്‍ക്കുലര്‍ സര്‍ക്കാര്‍ അനുമതിയില്ലാതെ പുറപ്പെടുവിക്കാന്‍ കഴിയുമോ, ഉത്തരവു നല്‍കുന്ന സമയത്തു ബെഹ്‌റ സംസ്ഥാന ഡിജിപി ആയിരുന്നോ എന്നും കോടതി ചോദിച്ചു. വിശദീകരണം നല്‍കാന്‍ വിജിലന്‍സിനോടു നിര്‍ദേശിച്ചു.

കേരള പൊലീസ് ഹൗസിങ് കണ്‍സ്ട്രക്ഷന്‍ കോര്‍പറേഷനും നിര്‍മ്മിതി കേന്ദ്രവും നിലവിലുള്ളപ്പോള്‍ ടെന്‍ഡര്‍ പോലും ക്ഷണിക്കാതെ സ്വകാര്യ കമ്പനിക്ക് പെയിന്റിങ് കരാര്‍ നല്‍കിയതില്‍ 500 കോടിയുടെ അഴിമതി നടന്നതായാണു പായിച്ചറ നവാസിന്റെ ഹര്‍ജിയിലെ ആരോപണം. കേസ് 20നു കോടതി പരിഗണിക്കും.അതേസമയം, ഇത്തരമൊരു ഉത്തരവു പുറപ്പെടുവിക്കുന്ന സമയത്ത് ബെഹ്റ പൊലീസ് മേധാവിയായിരുന്നോ എന്ന സംശയം കോടതി ഉന്നയിച്ചിട്ടുണ്ട്. ഡിജിപി ടി.പി. സെന്‍കുമാറിന്റെ പുനര്‍നിയമന വിഷയത്തില്‍ സുപ്രീം കോടതി ഉത്തരവ് പുറപ്പെടുവിച്ച ഏപ്രില്‍ 24നു ശേഷമാണ് ബെഹ്റ വിവാദ നിര്‍ദ്ദേശം നല്‍കിയത്. അതായത് പൊലീസ് മേധാവി സ്ഥാനം ഒഴിയുന്നതിനു തൊട്ടുമുന്‍പ്. ഈ സാഹചര്യത്തില്‍ ഇത്തരമൊരു ഉത്തരവ് പുറപ്പെടുവിക്കാന്‍ ബെഹ്റയ്ക്ക് അധികാരമുണ്ടോയെന്നാണ് കോടതി ആരാഞ്ഞു.