വാണാക്രൈയേക്കാള്‍ അപകടകാരികളായ വൈറസുകള്‍ പടരുന്നു

ഡിജിറ്റല്‍കറന്‍സി ലക്ഷ്യമിട്ട് വീണ്ടും കടുത്ത സൈബര്‍ ആക്രമണ ഭീതിയില്‍ ലോകം.ലോകരാജ്യങ്ങളെ ആകെ പിടിച്ചു കുലുക്കിയ വാണാക്രൈ റാന്‍സംവെയര്‍ ആക്രമണത്തിനു പിന്നാലെ കൂടുതല്‍ അപകടകാരികളായ വൈറസുകള്‍ ആയിരക്കണക്കിന് കമ്പ്യൂട്ടറുകളെ ബാധിച്ചതായി റിപ്പോര്‍ട്ട്. പുതിയ ആക്രമണത്തെ അഡൈക്കസ് എന്ന പേരിട്ടാണ് വാണാക്രൈ ആക്രമണം കണ്ടെത്തിയ ഗവേഷകനായ നിക്കോളാസ് ഗോഡ്യര്‍ വിശേഷിപ്പിച്ചത്.

പുതിയ ആക്രമണത്തിന് വാണാക്രൈ ആക്രമണത്തിനുപയോഗിച്ച ബിറ്റ്‌കോയിന് സമാനമായ ഡിജിറ്റല്‍ കറന്‍സിയാണ് ഉപയോഗിക്കുന്നത്.ഉത്തര കൊറിയന്‍ ഹാക്കര്‍മാര്‍ ഉപയോഗിച്ച മൊണേനോ എന്ന ഡിജിറ്റല്‍ കറന്‍സിയാണ് ഇതിനായി ഉപയോഗിക്കുന്നത്.ഈ മാര്‍ഗ്ഗത്തിലൂടെ ലക്ഷക്കണക്കിന് ഡോളറുകളാണ് ഹാക്കര്‍മാര്‍ ഇതുവരെ നേടിയത്.

വാണാക്രൈ ആക്രമണത്തിനു പിന്നാലെ കോടിക്കണക്കിന് ഇമെയില്‍ രേഖകളും പാസ് വേര്‍ഡുകളും ചോര്‍ന്നതായി കണക്കാക്കുന്നു.പ്രമുഖ സൈബര്‍ സുരക്ഷാ സൈറ്റുകളില്‍ നിന്നാണ് ഇവ ചോര്‍ന്നിരിക്കുന്നതെന്നാണ് വിവരം.ഇതോടെ സൈബര്‍ ആക്രമണത്തിന്റെ ഉത്തരവാദിത്വം യു എസ് ഏറ്റെടുക്കണമെന്നാരോപിച്ച് ചൈന രംഗത്തെത്തി.

ഇന്‍ഡ്യയിലും നിരവധി കമ്പ്യൂട്ടറുകളെ വാണാക്രൈ ബാധിച്ചു.വൈറസ് ലിങ്കുകള്‍ വാട്‌സ് അപ് വഴിയും ഇമെയില്‍ വഴിയും പ്രചരിക്കാന്‍ സാധ്യതയുള്ളതിനാല്‍ കേരത്തിലും ജാഗ്രതാ നിര്‍ദ്ദേശമുണ്ട്.സ്മാര്‍ട്‌ഫോണുകളും അപകടഭീഷണിയിലാണ്.പരിചയമില്ലാത്ത ഇ-മെയിലുകള്‍ തുറക്കരുതെന്ന നിര്‍ദ്ദേശവും നാഷണല്‍ ഇന്‍ഫൊര്‍മാറ്റിക്‌സ് സെന്റര്‍ നല്‍കുന്നുണ്ട്.