ഗോവയില്‍ പാലം തകര്‍ന്ന സംഭവം : രക്ഷാപ്രവര്‍ത്തനത്തിന് തടസ്സമായി മുതല ശല്യം

ഗോവയിലെ സുവാരി നദിക്കു കുറുകെയുള്ള പാലം തകര്‍ന്നുണ്ടായ ദുരന്തത്തില്‍ രണ്ട് പേര്‍ മരിച്ചു. നദിയിലെ മുതല ശല്യം രക്ഷാപ്രവര്‍ത്തകരെ കുഴക്കുകയാണ്. നേവിയും തീരദേശ സേനയും തെരച്ചില്‍ തുടരുന്നുണ്ട്. വ്യാഴാഴ്ച രാത്രിയാണ് നദിക്കു കുറുകെയുള്ള പഴയ പാലം തകര്‍ന്നത്. സന്‍മവാര്‍ഡെമിനേയും കുര്‍ചോരെമിനേയും തമ്മില്‍ ബന്ധിപ്പിക്കുന്ന പാലമാണ് തകര്‍ന്നത്. പാലത്തില്‍ നിന്ന് ചാടി ആത്മഹത്യയ്ക്ക് ശ്രമിച്ചയാളെ രക്ഷിക്കുന്നത് കാണാന്‍ ആളുകള്‍ തടിച്ചുകൂടിയതോടെ കാലപ്പഴക്കം കൊണ്ട് ബലക്ഷയം സംഭവിച്ച പാലം തകര്‍ന്ന് വീഴുകയായിരുന്നു. പോര്‍ച്ചുഗീസ് കാലത്ത് നിര്‍മ്മിച്ച പാലം നാലു വര്‍ഷം മുന്‍പാണ് അടച്ചത്.

മുതലശല്യമാണ് രക്ഷാപ്രവര്‍ത്തകര്‍ക്ക് ഭീഷണി ഉയര്‍ത്തുന്നത്. മുതലയെ പേടിച്ച് രക്ഷാപ്രവര്‍ത്തകര്‍ക്ക് നദിയുടെ ആഴങ്ങളിലേക്ക് എത്താന്‍ കഴിയുന്നില്ല. നദിയില്‍ വീണവരെ മുതലകള്‍ ആക്രമിക്കാനുള്ള സാധ്യതയും തള്ളിക്കളയുന്നില്ല. 15 പേരെ ഇപ്പോഴും കണ്ടെത്താന്‍ കഴിഞ്ഞിട്ടില്ല.