മൂന്നാര്‍ : സി.പി.എം മാത്രമല്ല സര്‍ക്കാര്‍ ; വിട്ടുവീഴ്ചയ്ക്കില്ലെന്ന് സി.പി.ഐ

മൂന്നാര്‍ വിഷയത്തില്‍ മുഖ്യമന്ത്രിയുടെ ഓഫീസ് യോഗം വിളിച്ചതായി സി.പി.ഐയെ അറിയിച്ചിട്ടില്ലെന്ന് സംസ്ഥാന സെക്രട്ടറി കാനം രാജേന്ദ്രന്‍. വിളിക്കാത്ത യോഗത്തില്‍ റവന്യൂമന്ത്രി പങ്കെടുക്കേണ്ടത് എന്തിന് എന്നും കാനം ചോദിക്കുന്നു. മുഖ്യമന്ത്രിയുടെ ഓഫീസ് ഏതെങ്കിലും യോഗം വിളിച്ചതായി അറിയില്ല. ഔദ്യോഗികമായി പാര്‍ട്ടി ഓഫീസില്‍ അറിയിപ്പ് ലഭിച്ചിട്ടില്ലെന്നും കാനം രാജേന്ദ്രന്‍ പറഞ്ഞു.

ദേവികുളം സബ് കലക്ടര്‍ ശ്രീരാം വെങ്കിട്ടരാമനെ മാറ്റണമോ വേണ്ടയോ എന്നത് മാധ്യമങ്ങളുടെയും ഏതെങ്കിലും കക്ഷികളുടെയോ കാര്യമല്ല. സര്‍ക്കാരിന്റെ നയങ്ങള്‍ നടപ്പാക്കുന്ന ഉദ്യോഗസ്ഥരെ സംരക്ഷിക്കേണ്ടത് സര്‍ക്കാര്‍ നയമാണ്. സി.പി.എം മാത്രമല്ല സര്‍ക്കാര്‍. ഏതു യോഗം വിളിച്ചാലും ഭൂസംരക്ഷണ നിയമപ്രകാരമേ തീരുമാനമെടുക്കാന്‍ കഴിയൂ. അല്ലാത്തപക്ഷം അതൊക്കെ ചോദ്യം ചെയ്യാന്‍ ഇവിടെ കോടതികള്‍ ഉണ്ടെന്ന് ബോധ്യം വേണമെന്നും കാനം രാജേന്ദ്രന്‍ പറഞ്ഞു.