സ്മാര്‍ട്ട്ഫോണ്‍ വിപണിയില്‍ വിപ്ലവം സൃഷ്ടിക്കാന്‍ അസൂസ് !

അമ്പരപ്പിക്കുന്ന ഫീച്ചറുകളുള്ള സ്മാര്‍ട്ട്‌ഫോണുമായി തായ്‌വാന്‍ സ്മാര്‍ട്ട്‌ഫോണ്‍ നിര്‍മ്മാതാക്കളായ അസൂസ് ഇന്ത്യയിലേക്ക്. ‘ലോകത്തിലെ ആദ്യ 8 ജിബി സ്മാര്‍ട്ട്‌ഫോണ്‍ ഇന്ത്യയിലേക്ക്’ എന്നാണ് ഇതുമായി ബന്ധപ്പെട്ട് അസൂസ് ട്വീറ്റ് ചെയ്തത്. എന്നാല്‍ ഫോണിന്റെ പേരോ മറ്റുള്ള വിശദാംശങ്ങളോ കമ്പനി വെളിപ്പെടുത്തിയിട്ടില്ല. അതേസമയം 8 ജിബി റാം ഹാന്‍ഡ്‌സെറ്റ് നേരത്തെ തന്നെ വണ്‍പ്ലസ് ഇന്ത്യയില്‍ അവതരിപ്പിച്ചു കഴിഞ്ഞിരുന്നു.

സെസ് 2017 ല്‍ ‘അസൂസ് സെന്‍ഫോണ്‍ എ ആര്‍’ എന്നപേരില്‍, ഡേ ഡ്രീം വിര്‍ച്വല്‍ റിയാലിറ്റി സോഫ്റ്റ്‌വെയര്‍, ഗൂഗിളിന്റെ ടാംഗോ ആര്‍ഗ്യുമെന്റഡ് റിയാലിറ്റി പ്ലാറ്റ്‌ഫോം എന്നിവയുടെ പിന്തുണയുള്ള ഒരു 8 ജിബി സ്മാര്‍ട്ട്‌ഫോണ്‍ അസൂസ് പുറത്തിറക്കിയിരുന്നു. ജനുവരിയില്‍ അവതരിപ്പിച്ച ഈ ഫോണ്‍ തന്നെയായിരിക്കും ഇന്ത്യയില്‍ അവതരിപ്പിക്കാന്‍ പോകുന്നതെന്നാണ് പുറത്തുവരുന്ന സൂചന.