നടിയെ ആക്രമിച്ച സംഭവം : ദൃശ്യങ്ങള്‍ ഇന്ന് ശാസ്ത്രീയ പരിശോധനയ്ക്ക് അയയ്ക്കും

നടിയെ ആക്രമിച്ച സംഭവത്തില്‍ പ്രതി പള്‍സര്‍ സുനിയും സംഘവും നടിയെ ഉപദ്രവിക്കുന്ന ദൃശ്യങ്ങള്‍ പോലീസിനു ലഭിച്ചെന്നു സൂചന. ദൃശ്യങ്ങള്‍ ഇന്ന് ശാസ്ത്രീയ പരിശോധനയ്ക്ക് അയയ്ക്കും. വാഹനത്തിനുള്ളിലെ ഇരുട്ടിലാണു ദൃശ്യങ്ങള്‍ ചിത്രീകരിച്ചത്. പോലീസിന്റെ പക്കലുള്ള രണ്ടരമിനിറ്റോളം നീളുന്ന ദൃശ്യങ്ങളില്‍ തേങ്ങലിന്റെ അവ്യക്തമായ ശബ്ദങ്ങളും ആസൂത്രിതമായി പകര്‍ത്തിയതാണെന്ന് സംശയിക്കപ്പെടുന്ന സാഹചര്യ തെളിവുകളും ഉണ്ട്.

അതേസമയം ദൃശ്യങ്ങളുടെ ആധികാരികത പോലീസ് ഉറപ്പാക്കിയിട്ടില്ല. സംഭവത്തിന് മുമ്പും പിമ്പുമുള്ള പത്തു ദിവസത്തെ ദൃശ്യങ്ങളാണ് ഇവ. നടിയെ ഉപദ്രവിച്ചതിന്റെ ദൃശ്യങ്ങളടങ്ങിയ ഫോണ്‍ പുഴയിലെറിഞ്ഞുവെന്നും മെമ്മറി കാര്‍ഡ് അഭിഭാഷകനെ ഏല്‍പിച്ചുവെന്നുമൊക്കെയായിരുന്നു പോലീസ് ചോദ്യം ചെയ്യലില്‍ പള്‍സര്‍ സുനി ആദ്യം പറഞ്ഞിരുന്നത്.