ലാലു പ്രസാദിന്റേയും മകന്റേയും വസതികളില്‍ സി.ബി.ഐ റെയ്ഡ്

ഭൂമി കുംഭകോണവുമായി ബന്ധപ്പെട്ട കേസില്‍ ബിഹാര്‍ മുന്‍ മുഖ്യമന്ത്രിയും ആര്‍.ജെ.ഡി നേതാവുമായ ലാലു പ്രസാദ് യാദവിന്റെയും ബിഹാര്‍ മന്ത്രിയും മകനുമായ തേജസ്വി യാദവിന്റെയും വസതികളില്‍ സി.ബി.ഐ റെയ്ഡ്. ഇന്നു പുലര്‍ച്ചെ 5.30 ഓടെയാണ് പട്‌നയിലെ വസതിയിലും ഒരു ഡസനിലേറെ മറ്റു സ്ഥാനങ്ങളിലൂം റെയ്ഡ് നടന്നത്. അഴിമതിയുമായി ബന്ധപ്പെട്ട് ഇവര്‍ക്കെതിരെ കേസെടുത്തിട്ടുമുണ്ട്.

2008ല്‍ കേന്ദ്ര റെയില്‍വേ മന്ത്രിയായിരിക്കേ ഒരു സ്വകാര്യ കമ്പനികള്‍ക്ക് രണ്ട് ഹോട്ടലുകള്‍ പാട്ടത്തിനു നല്‍കുകയും പകരമായി നേടിയ രണ്ട് ഏക്കര്‍ സ്ഥലത്ത് ഷോപ്പിംഗ് മാള്‍ പണിതുവെന്നുമാണ് ലാലുവിനെതിരായ കേസ്. ലാലുവിനു പുറമേ മന്ത്രിമാരായ രണ്ട് മക്കള്‍, ഭാര്യയും മുന്‍ മുഖ്യമന്ത്രിയുമായ റാബ്‌റി ദേവി എന്നിവര്‍ക്കെതിരെയും കേസ് രജിസ്റ്റര്‍ ചെയ്തിട്ടുണ്ട്.