കാവ്യയേയും അമ്മയേയും ചോദ്യം ചെയ്യും

നടി ആക്രമിക്കപ്പെട്ട കേസില്‍ കാവ്യാമാധവന്റെയും മാതാവ് ശ്യാമളയുടേയും മൊഴിയെടുക്കും. ഇവരുടെ സ്ഥാപനമായ ലക്ഷ്യയില്‍ പരിശോധന തുടരുമെന്നും പോലീസ് വ്യക്തമാക്കി. അതേസമയം കേസില്‍ പരാമര്‍ശിച്ചിരിക്കുന്ന 'മാഡം' എന്നൊരാള്‍ ഇല്ലെന്നും കേസ് വഴി തിരിച്ചുവിടാനുള്ള പള്‍സര്‍ സുനിയുടെ ഭാവനാസൃഷ്ടി മാത്രമാണ് ഇതെന്നും പോലീസ് ഉറച്ചു വിശ്വസിക്കുന്നു.

കേസില്‍ കാവ്യയ്ക്കും മാതാവിനും എന്തെങ്കിലും പങ്കാളിത്തം ഉണ്ടായിരുന്നോ ഇരുവര്‍ക്കും സംഭവത്തെക്കുറിച്ചു അറിവുണ്ടായിരുന്നോ തുടങ്ങിയ കാര്യങ്ങളാണ് അന്വേഷിക്കുക. ലക്ഷ്യ കേന്ദ്രീകരിച്ചും അന്വേഷണം തുടരും. കൃത്യം നടന്നതിന് മുമ്പ് സുനി ഇവിടെ നിന്നും പണം കൈപ്പറ്റിയിട്ടുണ്ടോ, കൃത്യത്തിന് ശേഷം മെമ്മറി കാര്‍ഡ് കൊണ്ടുവന്നോ, വന്നെങ്കില്‍ അത് ആരുടെ കയ്യില്‍ കൊടുത്തു തുടങ്ങിയ വിവരങ്ങളാണ് കാവ്യമാധവനില്‍ നിന്നും മാതാവില്‍ നിന്നും പോലീസിന് കിട്ടേണ്ടത്.