ദിലീപിനെ ഇന്ന് കോടതിയില്‍ ഹാജരാക്കും ; ജാമ്യാപേക്ഷയില്‍ ഇന്ന് വാദം കേള്‍ക്കും

നടിയെ തട്ടിക്കൊണ്ടു പോയ കേസില്‍ നടന്‍ ദിലീപിനെ ഇന്ന് കോടതിയില്‍ ഹാജരാക്കും. കസ്റ്റഡി കാലാവധി പൂര്‍ത്തിയായ സാഹചര്യത്തില്‍ നടന്റെ ജാമ്യാപേക്ഷ ഇന്ന് പരിഗണിക്കും. തെളിവെടുപ്പിനായി പോലീസ് സമര്‍പ്പിച്ച കസ്റ്റഡി അപേക്ഷ ചൊവ്വാഴ്ചയായിരുന്നു കോടതി സമര്‍പ്പിച്ചത്. കഴിഞ്ഞ രണ്ടു ദിവസമായി ദിലീപിനെ തൃശൂരിലെത്തിച്ച് തെളിവെടുപ്പ് നടത്തുകയായിരുന്നു.

തെളിവെടുപ്പിനായി എത്തിച്ചിടത്തെല്ലാം കൂക്കുവിളിയോടെയാണ് ജനക്കൂട്ടം ദിലീപിനെ സ്വീകരിച്ചത്. ഇന്ന് താരത്തി​ന്റെ ജാമ്യാപേക്ഷയിലുള്ള വാദത്തില്‍ ഗൂഡാലോചനയില്‍ ദിലീപിനെതിരേ തെളിവുകള്‍ കെട്ടിച്ചമച്ചതാണെന്ന വാദത്തില്‍ പ്രതിഭാഗം ഉറച്ചു നില്‍ക്കും. അതിനിടയില്‍ താരത്തിന് അനുകൂലമായ ഒരു തരംഗത്തിലേക്ക് സാമൂഹ്യമാധ്യമങ്ങളില്‍ വികാരം ശക്തിപ്പെട്ടു വരുന്നുണ്ട്. ഇത് ​‍കൃത്രിമമായി സൃഷ്ടിക്കപ്പെടുന്നതാണോ എന്ന വിധത്തില്‍ സംശയവും പോലീസിനുണ്ട്.