ദിലീപിന് ജാമ്യമില്ല : 25 വരെ റിമാന്‍ഡില്‍

നടിയെ ആക്രമിച്ച കേസില്‍ ദിലീപിന് ജാമ്യമില്ല. ദിലീപിന്റെ ജാമ്യാപേക്ഷയെ എതിര്‍ത്തുകൊണ്ടുള്ള പ്രോസിക്യൂഷന്റെ വാദം അങ്കമാലി മജിസ്ട്രേറ്റ് കോടതി പരിഗണിച്ചു.ദിലീപിനെ ഈ മാസം 25 വരെ റിമാന്‍ഡ് ചെയ്തു. സമൂഹത്തില്‍ ഏറെ സ്വാധീനമുള്ള വ്യക്തിയായതിനാല്‍ ജാമ്യത്തിലിറങ്ങിയാല്‍ ദിലീപ് സാക്ഷികളെ സ്വാധീനിക്കുമെന്നും സമൂഹ മാധ്യമങ്ങളില്‍ ദിലീപ് അനുകൂല പ്രചാരണം നടക്കുന്നതും പ്രോസിക്യൂഷന്‍ ചൂണ്ടിക്കാട്ടി. ഇരയ്‌ക്കെതിരെ പ്രതികൂല പ്രചാരണവും നടക്കുന്നു. ദിലീപ് കസ്റ്റഡിയില്‍ ഇരിക്കുമ്പോള്‍ തന്നെയാണ് ഇത് നടക്കുന്നത്. ദിലീപിനെതിരെ ശക്തമായ തെളിവുകളുണ്ട്.

കേസില്‍ നിര്‍ണായക വിവരങ്ങള്‍ അറിയാവുന്ന പ്രതീഷ് ചാക്കോ, അപ്പുണ്ണി എന്നിവര്‍ ഒളിവിലാണ്. ഇവരെ പിടികൂടേണ്ടതുണ്ടെന്നും പ്രോസിക്യൂഷന്‍ ചൂണ്ടിക്കാട്ടി. ഈ വാദം കോടതി അംഗീകരിച്ചു. പോലീസിനെതിരെ പരാതി വല്ലതുമുണ്ടോയെന്ന കോടതിയുടെ ചോദ്യത്തിന് ഒരു പരാതിയുമില്ലെന്ന് ദിലീപ് മറുപടി നല്‍കി. കോടതി നടപടി അവസാനിച്ചതോടെ 4.40 ഓടെ ദിലീപിനെ കോടതി പരിസരത്തുനിന്നും ആലുവ സബ് ജയിലിലേക്ക് കൊണ്ടുപോയി. ദിലീപിന് ജാമ്യത്തിനായി വീണ്ടും ഇതേ കോടതിയില്‍ തന്നെയെ സെഷന്‍സ് കോടതിയേയോ ഹൈക്കോടതിയേയോ സമീപിക്കാം.