ദിലീപിന്റെ ഡി സിനിമാസിന്റെയും കരുമാലൂരില്‍ വാങ്ങിയ ഭൂമിയും ഇന്ന് അളക്കും

ദിലീപിന്റെ ഡി സിനിമാസിന്റെയും കരുമാലൂരിലെയും ഭൂമി ഇന്ന് വീണ്ടും അളക്കും. ഇന്ന് രാവിലെ പതിനൊന്നരയോടെ സര്‍വേ തുടങ്ങും. ദിലീപിന് വേണ്ടി ഡി സിനിമാസിന്റെ മാനേജരോട് ഹാജരാകാന്‍ ആവശ്യപ്പെട്ടിട്ടുണ്ട്. ജില്ലാ സര്‍വേയറുടെ നേതൃത്വത്തിലാണ് റീ സര്‍വേ നടപടികള്‍ നടക്കുക. തീയറ്ററിനൊപ്പം അതേ സര്‍വേ നമ്പരിലുള്ള മറ്റ് ഭൂമികള്‍ അളക്കുന്നതിനായി ഏഴ് വ്യക്തികളോടും വരാന്‍ ആവശ്യപ്പെട്ടിട്ടുണ്ട്.

എറണാകുളം കരുമാലൂരില്‍ എട്ടു വര്‍ഷം മുമ്പ് ദിലീപ് വാങ്ങിയ സ്ഥലത്തും റീ സര്‍വേ നടപടികളുണ്ടാകും. കരുമാലൂര്‍ പഞ്ചായത്തിലെ കാരയ്ക്കാത്തുരുത്തില്‍ രണ്ടേക്കര്‍ ഭൂമി ദിലീപ് ആദ്യഭാര്യ മഞ്ജുവിന്റെ പേരിലായിരുന്നു വാങ്ങിയത്. ഇവിടെ പുറപ്പള്ളിക്കാവില്‍ ഒരേക്കറോളം വരുന്ന ഭൂമിയും ദിലീപ് കൈവശപ്പെടുത്തിയതായിട്ടാണ് ആരോപണം. ഇവിടെ വില്ലേജ് ഓഫീസറുടെ നേതൃത്വത്തിലായിരിക്കും നടപടികള്‍. അതിനിടെ കുമരകത്ത് ദിലീപ് വാങ്ങി മറിച്ചുവിറ്റ ഭൂമിയില്‍ കയ്യേറ്റമില്ലെന്ന് കളക്ടര്‍ റിപ്പോര്‍ട്ട് നല്‍കി .