കേരളത്തിലെ സര്‍ക്കാരിനെ പിരിച്ചുവിടണമെന്ന് സുബ്രഹ്മണ്യന്‍ സ്വാമി

ന്യൂഡല്‍ഹി: കേരളത്തിലെ സര്‍ക്കാരിനെ പിരിച്ചുവിടണമെന്ന് ബിജെപി നേതാവ് സുബ്രഹ്മണ്യന്‍ സ്വാമി. സംസ്ഥാനത്ത് തുടര്‍ച്ചയായി ഉണ്ടാകുന്ന രാഷ്ട്രീയ കൊലപാതകങ്ങളും ആക്രമണങ്ങളും തടയാന്‍ കേന്ദ്രസര്‍ക്കാര്‍ ഇടപെടണമെന്നും അദ്ദേഹം ആവശ്യപ്പെട്ടു. തിരുവനന്തപുരത്തിനടുത്ത് ശ്രീകാര്യത്ത് ആര്‍എസ്എസ് കാര്യവാഹക് രാജേഷ് കൊല്ലപ്പെട്ട സംഭവത്തില്‍ പ്രതികരിക്കുകയായിരുന്നു അദ്ദേഹം.

കൊലപാതകത്തിന് പിന്നില്‍ സിപിഐഎം ആണെന്ന് ആരോപിച്ചു ബിജെപി കേരളത്തില്‍ ഹര്തലിനു ആഹ്വാനം ചെയ്തിരുന്നു. തലസ്ഥാനത്ത് വ്യാഴാഴ്ച്ച മുതല്‍ അക്രമ സംഭവങ്ങള്‍ അരങ്ങേറുകയാണ്. അതിനിടയിലാണ് ശ്രീകാര്യത്ത് രാജേഷ് കൊല്ലപ്പെടുന്നത്. ആര്‍എസ്എസ്- ബിജെപി പ്രവര്‍ത്തകരെ കൊലപ്പെടുത്തി ആഘോഷിക്കുകയാണു കേരളത്തിലെ സിപിഎം. മതിഭ്രമം ബാധിച്ചവരാണു സംസ്ഥാനം ഭരിക്കുന്നതെന്നും സുബ്രഹ്മണ്യന്‍ സ്വാമി ആരോപിച്ചു.