രാജേഷിന്റെത് രാഷ്ട്രീയ കൊലപാതകമെന്ന്‌ എഫ്.ഐ.ആര്‍

ആര്‍.എസ്.എസ് കാര്യവാഹ് രാജേഷിനെ കൊലപ്പെടുത്തിയത് രാഷ്ട്രീയ കാരണങ്ങളാലാണെന്ന് വ്യക്തമാക്കി പോലീസിന്റെ പ്രഥമ വിവര റിപ്പോര്‍ട്ട്. പ്രദേശത്ത് കുറച്ചുകാലമായി നില്‍ക്കുന്ന രാഷ്ട്രീയ സംഘര്‍ഷങ്ങളുടെ ഭാഗമാണ് കൊലപാതകമെന്ന് എഫ്.ഐ.ആറില്‍ പറയുന്നു.

ബി.ജെ.പി-ഡി.വൈ.എഫ്.ഐ. പ്രവര്‍ത്തകര്‍ തമ്മിലുള്ള സംഘര്‍ഷത്തിന്റെ പേരിലാണ് കൊലപാതകം നടന്നിരിക്കുന്നത്. 11 പേര്‍ കൊലപാതകത്തില്‍ പങ്കാളികളാണ്. ഏഴു പേരെ അറസ്റ്റു ചെയ്തു. പ്രദേശത്തെ സമാധാനാന്തരീക്ഷം തകര്‍ക്കുക എന്ന ലക്ഷ്യത്തോടെ ബോംബെറിഞ്ഞ് ഭീകരാന്തരീക്ഷം സൃഷ്ടിക്കുകയും ആര്‍.എസ്.എസ് ശാഖ കഴിഞ്ഞെത്തിയ രാജേഷിനെ വെട്ടിക്കൊലപ്പെടുത്തുകയായിരുന്നുവെന്നും എഫ്.ഐ.ആറില്‍ പറയുന്നു. കൊലപാതകത്തിനു പിന്നില്‍ വ്യക്തമായ ഗൂഢാലോചന നടന്നിട്ടുണ്ടെന്നും ഗൂഢാലോചനയെ കുറിച്ച് കൂടുതല്‍ അന്വേഷണം ആവശ്യമാണെന്നും എഫ്.ഐ.ആറില്‍ പറയുന്നു. അറസ്റ്റിലായ പ്രതികളെ ഇന്ന് കോടതിയില്‍ ഹാജരാക്കും.