പാകിസ്താന്റെ പുതിയ പ്രധാനമന്ത്രിയെ ഇന്നറിയാം

പാകിസ്താന്റെ പുതിയ പ്രധാനമന്ത്രിയെ ഇന്ന് തെരഞ്ഞെടുക്കും. ഇടക്കാല പ്രധാനമന്ത്രി തെരഞ്ഞെടുപ്പിനായി ആറു പേരാണ് ഇന്നലെ പത്രിക സമര്‍പ്പിച്ചിരിക്കുന്നത്. പ്രതിപക്ഷത്തുനിന്നും ഏകകണ്ഠമായി ഒരു സ്ഥാനാര്‍ത്ഥിയെ നിശ്ചയിക്കുന്നതില്‍ കക്ഷികള്‍ക്ക് സമവായത്തില്‍ എത്താന്‍ കഴിഞ്ഞിരുന്നില്ല. പാര്‍ലമെന്റിലെ നാഷണല്‍ അസംബ്ലിയാണ് പ്രധാനമന്ത്രിയെ തെരഞ്ഞെടുക്കുന്ന ഇലക്ടറല്‍ കോളജ്.

നവാസ് ഷെരീഫിന്റെ പാകിസ്താന്‍ മുസ്ലീം ലീഗ്-നവാസ് പാര്‍ട്ടി നിര്‍ദേശിക്കുന്ന ഷഹീദ് ഖക്വന്‍ അബ്ബാസി, ഷെരീഫിന്റെ സഹോദരനായ ഷഹബാസ്, പാകിസ്താന്‍ പീപ്പിള്‍സ് പാര്‍ട്ടി നേതാവും നാഷണല്‍ അസംബ്ലിയിലെ പ്രതിപക്ഷ നേതാവും സെയ്ദ് ഖുര്‍ഷിദ് ഷാ, പാകിസ്താന്‍ തെഹ്‌രീകെ ഇന്‍സാഫ് നേതാവ് ഷെയ്ഖ് റഷീദ് അഹമ്മദ്, ഇസ്ലാമിക് പാര്‍ട്ടി ജമാഅത്തെ ഇസ്ലാമി നേതാവ് ഷഹിബ്‌സാദ തരിഖുള്ള എന്നിവരാണ് മത്സരരംഗത്തുള്ളത്. പാനമ കേസില്‍ നവാസ് ഷെരീഫും കുടുംബവും കുറ്റക്കാരാണെന്ന് സുപ്രീം കോടതി കണ്ടെത്തിയതോടെയാണ് ഷെരീഫിന് സ്ഥാനമൊഴിയേണ്ടിവന്നത്.