ഇനി ഗോവെ ചെന്ന് അടിച്ച് ഫിറ്റാകാമെന്ന് ആരും വിചാരിക്കേണ്ട, അകത്താകും !

സഞ്ചാരികളുടേയും ഇഷ്ടസ്ഥലമാണ് ഗോവ. ഇന്ത്യയില്‍ നിന്നും വിദേശത്തുനിന്നുമായി നിരവധി ടൂറിസ്റ്റുകളാണ് ഗോവന്‍ തീരത്ത് എത്തുന്നത്. ഇപ്പോള്‍ സഞ്ചാരികളെ ഏറെ വിഷമിപ്പിക്കുന്ന ഒരു റിപ്പോര്‍ട്ടാണ് പുറത്ത് വരുന്നത്. ബീച്ചില്‍ ഇരുന്ന് മദ്യപിച്ചാല്‍ അവരെ കാത്തിരിക്കുന്നത് അറസ്റ്റും ജയില്‍വാസവുമായിരിക്കും.

ഗോവയിലെ ബീച്ചുകളുടെ മനോഹാരിതയെ സംരക്ഷിക്കുന്നതിന്റെ ഭാഗമായിട്ടാണ് ബിജെപി നേതൃത്വത്തിലുള്ള സംസ്ഥാന സര്‍ക്കാര്‍ ഇത്തരത്തിലൊരു നിയമവുമായി രംഗത്തെത്തിയത്. ചൊവ്വാഴ്ച നടന്ന നിയമസഭാ സമ്മേളനത്തില്‍ ഗോവയുടെ ടൂറിസം മന്ത്രി മനോഹര്‍ അജോങ്കറാണ് ഇക്കാര്യം വ്യക്തമാക്കിയത്.

ഗോവന്‍ ബീച്ചുകള്‍ കാത്തു സംരക്ഷിക്കേണ്ടതാണെന്നും, കടല്‍ത്തീരങ്ങളില്‍ അടിഞ്ഞ് കൂടുന്ന മദ്യക്കുപ്പികള്‍ പ്രദേശത്തെ ഏറെ ദോഷകരമായി ബാധിക്കുന്നുണ്ടെന്നും പഠനത്തില്‍ കാണിച്ചിട്ടുണ്ട്. ബീച്ചുകളില്‍ ഇരുന്ന് കൊണ്ട് മദ്യപിക്കരുതെന്ന് ടൂറിസ്റ്റുകളോട് ആവശ്യപ്പെട്ടിട്ടുണ്ട്, നിയമത്തെ അനുസരിക്കാത്തവരെ അറസ്റ്റ് ചെയ്യാനും മടിക്കില്ല' ടൂറിസം മന്ത്രി നിര്‍ദ്ദേശിച്ചിട്ടുണ്ട്. കടല്‍ത്തീരങ്ങളിലെ ഗാര്‍ഡുമാരോട് മയക്കു മരുന്ന് ഉപയോഗിക്കുന്നവരെയും ഇവ വില്‍ക്കുന്നവരേയും പിടികൂടണമെന്ന് കര്‍ശന നിര്‍ദ്ദേശം നല്‍കിയിട്ടുണ്ട്.