മദനിക്ക് സുരക്ഷ ഒരുക്കാമെന്ന കേരളത്തിന്റെ വാദം സുപ്രീം കോടതി തള്ളി

പി.ഡി.പി നേതാവ് അബ്ദുള്‍ നാസര്‍ മദനിക്ക് കേരളത്തില്‍ എത്തുന്നതിന് സൗജന്യ സുരക്ഷ ഒരുക്കാമെന്ന സംസ്ഥാന സര്‍ക്കാരിന്റെ വാദം സുപ്രീം കോടതി തള്ളി. മദനിയുടെ സുരക്ഷാ ചെലവിലേക്ക് അമിത തുക ചുമത്തിയ കര്‍ണാടക സര്‍ക്കാരിന്റെ നടപടിയെ കോടതി വിമര്‍ശിച്ചു. സുരക്ഷ ചുമതലയിലുള്ള ഉദ്യോഗസ്ഥര്‍ക്ക് ഡി.എയും ടി.എയും മാത്രം നല്‍കിയാല്‍ മതിയെന്നും പുതുക്കിയ ചെലവ് പട്ടിക നാളെ തന്നെ സമര്‍പ്പിക്കാനും കോടതി നിര്‍ദേശിച്ചു.

മദനിക്ക് സുരക്ഷ ഒരുക്കാന്‍ കര്‍ണാടകയ്ക്ക് ബുദ്ധിമുട്ടുണ്ടെങ്കില്‍ അക്കാര്യം കേരള പോലീസ് നിര്‍വഹിക്കാമെന്ന് കേസ് പരിഗണിക്കുന്നതിനിടെ കേരള സര്‍ക്കാരിന്റെ അഭിഭാഷകന്‍ കോടതിയില്‍ ചൂണ്ടിക്കാട്ടി. ഇത് കോടതി തുടക്കത്തിലെ തന്നെ തള്ളിക്കളഞ്ഞു. കര്‍ണാടക പോലീസിന്റെ കസ്റ്റഡിയില്‍ ഉള്ള ഒരു വ്യക്തിക്ക് സുരക്ഷ ഒരുക്കേണ്ടത് കര്‍ണാടകയുടെ ചുമതലയാണ്. അതില്‍ കേരളം ഇടപെടേണ്ട കാര്യമില്ലെന്ന് കോടതി വ്യക്തമാക്കി. മദനി കേരളത്തില്‍ പ്രവേശിക്കുമ്പോള്‍ കൂടുതല്‍ സുരക്ഷ വേണമെന്ന് കര്‍ണാടക പോലീസ് ആവശ്യപ്പെടുന്ന പക്ഷം മാത്രം സുരക്ഷ നല്‍കിയാല്‍ മതിയാകുമെന്നും കോടതി വ്യക്തമാക്കി.

സുരക്ഷാ ചെലവിലേക്കായി 14 ലക്ഷം രൂപയാണ് മദനിയോട് കര്‍ണാടക ആവശ്യപ്പെട്ടത്. ഉദ്യോഗസ്ഥരുടെ ചെലവുകള്‍ അടക്കമുള്ള തുകയാണ് ആവശ്യപ്പെട്ടിരുന്നത്. ഒരു ഉദ്യോഗസ്ഥന് പ്രതിദിനം 8,400 രൂപ നിരക്കിലായിരുന്നു പട്ടിക നല്‍കിയിരുന്നത്. ഉദ്യോഗസ്ഥന്റെ ഒരു ദിവസത്തെ ശമ്പളവും മറ്റും ഉള്‍പ്പെടുത്തിയാണ് ഈ തുക കാണിച്ചിരുന്നത്. ഇത്രയും ഭീമമായ തുക നല്‍കാന്‍ കഴിയില്ലെന്ന് കാണിച്ച് മദനി സമര്‍പ്പിച്ച ഹര്‍ജി പരിഗണിക്കുമ്പോഴാണ് കോടതി വിമര്‍ശനം ഉന്നയിച്ചത്.