രാജ്യസഭാ തെരഞ്ഞെടുപ്പ്: കോണ്‍ഗ്രസിന്റെ ഹര്‍ജി സുപ്രീം കോടതി തള്ളി

രാജ്യസഭാ തെരഞ്ഞെടുപ്പില്‍ 'നോട്ട' ഒഴിവാക്കണമെന്ന് ആവശ്യപ്പെട്ട് കോണ്‍ഗ്രസ് നല്‍കിയ ഹര്‍ജി സുപ്രീം കോടതി തള്ളി. 'നോട്ട' കൂടി ഉള്‍പ്പെടുത്തി വോട്ടെടുപ്പ് നടത്താമെന്നാണ് സുപ്രീം കോടതിയുടെ നിര്‍ദേശം. 'നോട്ട' ഉള്‍പ്പെടുത്തിയ തെരഞ്ഞെടുപ്പ് കമ്മീഷന്റെ നടപടിക്കെതിരെ സ്‌റ്റേ ആവശ്യപ്പെട്ടാണ് കോണ്‍ഗ്രസ് സുപ്രീം കോടതിയെ സമീപിച്ചത്. കോണ്‍ഗ്രസും ബി.ജെ.പിയും രാഷ്ട്രീയ ബലാബലം പരീക്ഷിക്കുന്ന ഗുജറാത്തില്‍ അട്ടിമറി നടക്കുമോ എന്ന ഭീതിയാണ് നോട്ടയ്‌ക്കെതിരെ തിരിയാന്‍ കോണ്‍ഗ്രസിനെ പ്രേരിപ്പിച്ചത്. ഗുജറാത്തില്‍ നിന്ന് രാജ്യസഭയിലേക്ക് മൂന്ന് ഒഴിവുകളാണുള്ളത്. ഇതില്‍ രണ്ടെണ്ണം ബി.ജെ.പി ഉറപ്പാക്കിയതാണ്. പാര്‍ട്ടി അധ്യക്ഷന്‍ അമിത് ഷായും കേന്ദ്രമന്ത്രി സ്മൃതി ഇറാനിയുമാണ് ഈ സീറ്റുകളില്‍ തെരഞ്ഞെടുക്കപ്പെടുന്നത്.