മദനിയുടെ യാത്രാചെലവ് : 15 ലക്ഷത്തില്‍ നിന്ന് 1.18 ലക്ഷമായി സുപ്രീം കോടതി വെട്ടിക്കുറച്ചു

അബ്ദുള്‍ നാസര്‍ മദനിക്ക് കേരള സന്ദര്‍ശനത്തിന് ചെലവഴിക്കേണ്ട തുക സുപ്രീം കോടതി ഇടപെട്ട് വെട്ടിക്കുറച്ചു. കര്‍ണാടക സര്‍ക്കാര്‍ ആവശ്യപ്പെട്ടിരുന്ന 15 ലക്ഷത്തോളം രുപയുടെ കണക്ക് വെട്ടിക്കുറച്ച് 1,18,000 രൂപയാക്കി. കൂടാതെ മദനിക്ക് ഈ മാസം ആറു മുതല്‍ 19 വരെ കേരളത്തില്‍ ചെലവഴിക്കാമെന്നും കോടതി വ്യക്തമാക്കി.

മദനിയുടെ സുരക്ഷയ്ക്കായി നിയോഗിക്കുന്ന ഉദ്യോഗസ്ഥര്‍ക്കായി ദിനബത്തയും യാത്രാബത്തയും മാത്രമേ മദനിയില്‍ നിന്ന് ഈടാക്കാവൂവെന്ന് കോടതി നിര്‍ദേശിച്ചു. എന്നാല്‍ തന്റെ സുരക്ഷയ്ക്ക് 19 ഉദ്യോഗസ്ഥര്‍ ആവശ്യമില്ലെന്നും എണ്ണം കുറയ്ക്കണമെന്നുമുള്ള മദനിയുടെ വാദം കോടതി അംഗീകരിച്ചില്ല.