രാഷ്ട്രീയ സംഘര്‍ഷം : ഇന്റലിജന്‍സ് റിപ്പോര്‍ട്ട് കിട്ടിയിട്ട് മുഖ്യമന്ത്രി എന്ത് നടപടി എടുത്തുവെന്ന് കുമ്മനം

തലസ്ഥാനത്ത് സംഘര്‍ഷങ്ങളുണ്ടാകുമെന്ന് ഇന്റലിജന്‍സ് റിപ്പോര്‍ട്ട് കിട്ടിയിരുന്നുവെങ്കില്‍ മുഖ്യമന്ത്രി എന്തു നടപടിയെടുത്തുവെന്ന് ബി.ജെ.പി സംസ്ഥാന അധ്യക്ഷന്‍ കുമ്മനം രാജശേഖരന്‍. ഇത് സംബന്ധിച്ച് മുഖ്യമന്ത്രി ഇന്ന് നിയമസഭയില്‍ നടത്തിയ പ്രസ്താവന തെറ്റിദ്ധാരണ പരത്തുന്നതാണെന്നും കുമ്മനം പറഞ്ഞു. മെഡിക്കല്‍ കോഴ മറച്ചുവയ്ക്കാന്‍ കരുതിക്കൂട്ടി നടത്തിയതാണ് തിരുവനന്തപുരത്തെ രാഷ്ട്രീയ സംഘര്‍ഷങ്ങള്‍ എന്ന രീതിയില്‍ മുഖ്യമന്ത്രി ഇന്ന് നിയമസഭയില്‍ പ്രസ്താവന നടത്തിയിരുന്നു. ആക്രമണത്തിനുള്ള ശ്രമങ്ങളുണ്ടാകുമെന്ന് ഇന്റലിജന്‍സ് റിപ്പോര്‍ട്ട് ഉണ്ടായിരുന്നുവെന്നാണ് മുഖ്യമന്ത്രിയുടെ പ്രസ്താവന.

തിരുവനന്തപുരത്ത് നടന്ന അക്രമസംഭവങ്ങളില്‍ ഒരു നടപടിയും സ്വീകരിക്കാന്‍ സര്‍ക്കാരിന് കഴിഞ്ഞിട്ടില്ല. മുഖ്യമന്ത്രി വസ്തുതകള്‍ വളച്ചൊടിക്കുകയാണ്. ഇന്റലിജന്‍സ് റിപ്പോര്‍ട്ട് എന്നത് കല്പിച്ചുണ്ടാക്കിയ കെട്ടുകഥയാണെങ്കിലും അതില്‍ എന്ത് നടപടിയാണ് സര്‍ക്കാര്‍ സ്വീകരിച്ചതെന്ന് വ്യക്തമാക്കണമെന്ന് അദ്ദേഹം പറഞ്ഞു.