ബി.ജെ.പി അധ്യക്ഷന്റെ മകനെതിരായ കേസ്: സിസിടിവി ദൃശ്യങ്ങള്‍ ലഭ്യമല്ലെന്ന് പോലീസ്

ഹരിയാന ബി.ജെ.പി അധ്യക്ഷന്‍ സുഭാഷ് ബരാലയുടെ മകന്‍ വികാസ് ബരാല മദ്യലഹരിയില്‍ യുവതിയെ പിന്തുടര്‍ന്നുവെന്ന് പറയുന്ന സ്ഥലത്തെ കാമറകള്‍ പ്രവര്‍ത്തിക്കുന്നില്ലെന്നും സിസിടിവിയില്‍ ദൃശ്യങ്ങളും ലഭ്യമല്ലെന്നും പൊലീസ്‌. മുതിര്‍ന്ന ഐഎഎസ് ഉദ്യോഗസ്ഥന്റെ മകള്‍ നല്‍കിയ പരാതിയിലാണ് കഴിഞ്ഞ ദിവസം വികാസിനെയും സുഹൃത്തിനെയും കസ്റ്റഡിയില്‍ എടുത്തത്.

സെക്ടര്‍ 7 മുതല്‍ ഹൗസിംഗ് ബോര്‍ഡ് ട്രാഫിക് ലൈറ്റ് പോയിന്റ് വരെയുള്ള ഒന്‍പത് കാമറകള്‍ പരിശോധിച്ചു. എല്ലാം പ്രവര്‍ത്തനരഹിതമായിരുന്നുവെന്ന് ഡി.വൈ.എസ്.പി സതീഷ് കുമാര്‍ പറയുന്നു. അതേസമയം, ഇത്രയും പ്രധാനപ്പെട്ട മേഖലയില്‍ സിസിടിവി കാമറകള്‍ പ്രവര്‍ത്തിക്കുന്നില്ലെന്നുള്ളത് വിചിത്രമായിരിക്കുന്നുവെന്നാണ് മറ്റൊരു ഓഫീസര്‍ മാധ്യമങ്ങളോട് പ്രതികരിച്ചത്. കേസില്‍ യുക്തമായ നടപടിയുണ്ടാകും വരെ നിയമപോരാട്ടം നടത്തുമെന്നാണ് യുവതിയും വീട്ടുകാരും പറയുന്നത്.

ശനിയാഴ്ച പുലര്‍ച്ചെ 12.25 ഓടെയാണ് യുവതിയെ ഇവര്‍ കാറില്‍ പിന്തുടര്‍ന്നത്. യുവതിയുടെ കാറിനു മുന്നില്‍ തടസ്സം സൃഷ്ടിച്ച് നിര്‍ത്തിയ ശേഷം തട്ടിക്കൊണ്ടുപോയി ആക്രമിക്കാനായിരുന്നു പദ്ധതി. എന്നാല്‍ യുവതി കണ്‍ട്രോള്‍ റൂമില്‍ വിളിച്ചറിയിച്ചതോടെയാണ് ഇവരുടെ പദ്ധതി പൊളിഞ്ഞത്.