അഹമ്മദ് പട്ടേലിന്റെ നില പരുങ്ങലില്‍ ; എന്റെ വോട്ട് പാഴാക്കാന്‍ ഉദ്ദേശിക്കുന്നില്ലെന്ന് ശങ്കര്‍ സിംഗ് വഗേല !

ഗുജറാത്തില്‍ നിന്നുള്ള രാജ്യസഭാംഗങ്ങളുടെ തെരഞ്ഞെടുപ്പില്‍ അഹമ്മദ് പട്ടേലിന്റെ നില പരുങ്ങലില്‍. പട്ടേലിന് വോട്ട് ചെയ്തില്ലെന്ന് ശങ്കര്‍ സിംഗ് വഗേല വ്യക്തമാക്കി. കോണ്‍ഗ്രസിന്റെ മുന്‍ സംസ്ഥാന അധ്യക്ഷനും മുന്‍ പ്രതിപക്ഷ നേതാവുകൂടിയാണ് വഗേല. തോല്‍ക്കുന്ന സ്ഥാനാര്‍ത്ഥിക്ക് എന്തിന് വോട്ട് ചെയ്യണമെന്നായിരുന്നു വഗേല ഇതിനോട് പ്രതികരിച്ചത്. പട്ടേല്‍ തന്റെ സുഹൃത്താണെന്നായിരുന്നു വഗേല നേരത്തെ പറഞ്ഞിരുന്നത്.

പട്ടേല്‍ ജയിക്കാന്‍ ഒരു സാധ്യതയുമില്ലാത്തതിനാല്‍ താന്‍ അദ്ദേഹത്തിന് വോട്ട് ചെയ്തില്ല. എന്റെ വോട്ട് പാഴാക്കാന്‍ ഉദ്ദേശിക്കുന്നില്ല. അഹമ്മദുമായി നല്ല ബന്ധമുണ്ട്. എന്നാല്‍ എന്റെ വോട്ട് വിലയില്ലാതാക്കാന്‍ കഴിയില്ല. ഗുജറാത്തില്‍ നിന്ന് മൂന്ന് ബി.ജെ.പി അംഗങ്ങളാണ് വിജയിക്കാന്‍ പോകുന്നത്. എന്‍.സി.പി എം.എല്‍.എയും ബി.ജെ.പിയെയാണ് പിന്തുണയ്ക്കുന്നത്. രാജ്യസഭാ തെരഞ്ഞെടുപ്പില്‍ അഹമ്മദ് പട്ടേലിനെ വിജയിപ്പിക്കാന്‍ കോണ്‍ഗ്രസ് ഒന്നും ചെയ്തില്ല. കോണ്‍ഗ്രസിന്റെ പക്കലുള്ള 44 അംഗങ്ങളില്‍ പലരും ബി.ജെ.പിക്ക് വോട്ട് ചെയ്യുമെന്നും വഗേല പറഞ്ഞു.