നടിയെ ആക്രമിച്ച കേസില്‍ പുലിമുരുകന്റെ സംവിധായകന്‍ വൈശാഖിനെ പൊലീസ് ചോദ്യം ചെയ്യുന്നു

നടിയെ ആക്രമിച്ച കേസില്‍ മോഹന്‍ലാല്‍ നായകനായ പുലിമുരുകന്റെ സംവിധായകന്‍ വൈശാഖിനെ പൊലീസ് ചോദ്യം ചെയ്യുന്നു. ആലുവ പൊലീസ് ക്ലബില്‍ വെച്ചാണ് മൊഴിയെടുക്കുന്നത്. കേസുമായി ബന്ധപ്പെട്ട് ഇതിനകം നിരവധി പേരെയാണ് പൊലീസ് ചോദ്യം ചെയ്തിരിക്കുന്നത്.

ദിലീപ് നായകനായ ‘സൌണ്ട് തോമ’യുടെ സംവിധായകനാണ് വൈശാഖ്. ചിത്രത്തിന്റെ ഷൂട്ടിങ് ലൊക്കേഷനില്‍ കേസിലെ മുഖ്യപ്രതി പള്‍സര്‍ സുനി എത്തിയതായി പൊലീസിന് തെളിവുകള്‍ ലഭിച്ചിരുന്നു. റിമാന്‍ഡില്‍ കഴിയവേ സുനി ദിലീപിനയച്ച കത്തില്‍ ‘സൌണ്ട് തോമ മുതല്‍ ജോര്‍ജ്ജേട്ടന്‍സ് പൂരം വരെയുള്ള കാര്യങ്ങള്‍ ഒന്നും ഞാന്‍ ആരോടും പറഞ്ഞിട്ടില്ലെന്ന്’ എഴുതിയിരുന്നു. സുനിയുടെ കത്തില്‍ പറഞ്ഞിട്ടുള്ള കാര്യങ്ങളെ കുറിച്ചും ഷൂട്ടിങ് ലൊക്കെഷനില്‍ സുനിയെ കണ്ടിട്ടുണ്ടോയെന്നും തുടങ്ങിയ കാര്യങ്ങളില്‍ വ്യക്തത വരുത്താനാണ് പൊലിസ് വൈശാഖിന്റെ മൊഴി എടുക്കുന്നത്.